Lalsanglen Haokip (Ch.Avenue)
 
Thuso khat neidoh kitihi nampi khantou nakhat ahin, ahinlah thuso mantam dan leh natoh thei dan hohi eiho society sung avang alhasam lheh nalaiyin hijeh chun thuso khat nahchang sal’a inei doh ujong leh sumtong kiholna dan’in ilaji uvin phatah a nampi GOU ahina ban’a nampi thusoh gil jouse hung kitahlang jing napen ahilam ihethem ji pouvin hijeh chun kichih sah deuvin demna ding dang umlouvin apao kiledan ahilou leh apeh lhom asim hah tihon idem uvin midang bol thuso dang joh ikhohsah uvin, hijeh chun  pha hen itiuleh GOSEM ngailu cheh utin kitho pi joleu hen midang thuso bang’a nikhat leh hetthei tah thuso hung hidoh thei ahi. Amavang eiho society sung vangchu khat in iham tia ahin jih khel tahjong leh gihna umpai ngal ji ahilou leh aseiset nalai ding leh ataitom’a ipan jing nalai jiu. Jih khel hochu gihna hilou a jihdih na a thuso ma a donbut joh hi kithem levang pha lheh ding ahi. I-umchan ikhosah dan uhi eiho insung a vangchu humpi/keipi ibah jiu ahinlah jatdang namdang masang’a jihthoa donbut thei ngapcha ilhom jiuhi igelleh pohnat leh nuijat jong ium jiuvin ahi.

Epichu hileh GOSEM thuso thuchu pohnat jeh a iminphah thu u bou ahin eseinom uvang chu ahileh hitobang nampi sung laigil hin phongdoh jia nampi masang’a hin tahlang jing thuso ahilou leh megazine inei chasun houhi iti lamdol’a machal sah a inei cheng uhi phatah a malam nosah ding ham tihi lam chom chom’a lunggel ngeito jong um nantin ahinlah tunia igel khom diuva deisah um vang chu ahileh eimite society sung ahin kijah matto nading inei thou tauvin ahinlah amachal theina ding’in PONTHO uvin tikal umlou dan’in akilang in hijehchun inam sung uva lasa them tah tah ho kipapina a Muzeeko Award tin kumseh leh til khouna toh lhon’in kipaman ipe jiuvin,hiho hin namsung’a lasa them ho hatah a khantou nading leh malam anosah jing’in ahinlah thuso lampang ahin gel khohna leh lainatna inei pouvin hijehchun hithei ding hihenlang hileh Thadou Kuki Journalist Union lamkai hoham ahilouleh nampi sung’a pohnatna neiya kiloi khomna hon Journalism Award hinsem doh uhen lang hileh thuso inei chasun ho ahin namsung’a aching athem tampi hohin lunggel ngeito hinsei thei intin chutileh athep nau achih nau cheng hin tahlang jing uvin tin, kumlhun tengleh unity lam’a lekha jih them ahilou leh khantou nalam a jih them chuleh emerging columnist tiho bang’in Award hi kipe theileh nampi khangtou teiding in tahsan aum’in ahi. Ajehchu phat sot beh loulai a ana kiphut doh Muzeeko Award jong ahung kibol jing tolhon’in eimi society sung’a lasathem hihen lang lamthem hijong leh hapta seh tobang in ahung pung tan hiche toh kilhon chun motion album thah thah ihin podoh thei tauvin hichehi khantou nalou ipi ham? (hitin tho uhen khutin tho uhen tipachu thilchom hileh).

Chungchon’a lasathem honjong ahithei chan’in nampi kilung khatna ding nampi laa hohi cassette jousea khat beh pang tei jileh pha lheh ding’in kamun ahi. Amavang ichen khompiu meilhei ho album vel’a nangtai lou numei hohi ui leh kel’in kamui/nang tailou numei hohi loi leh bong bangin kamui kiti hobang’a eimiten jong sahding beihel bang’a tailou keikhat laa dan’a isah houhi kibolda leh phante.

Hijehchun achung’a kisei eimi journalist union hon hin gelthem uhen lang hitobang Journalism Award hi namsung ah kiphutdoh thei leh lekha them tampi inei houhin Award khel khel delna hi hih jong leh lekha jih nalam’a gunchu na hinnei thei tei uvinte tihi nampi lamkai hon ahin gel khoh diuvin ikitem nom uvin. Hitobang hi ahithei tahlou jong leh namsung pona a Laizon Digest Muzeeko Award bang’a goptha a bol thei ham tijong gelkul ding’in thuso khantouna ding’in poimo kasan ahi. Ihet diu khat vangchu eiho society sung’a thusoh lasoh hohi atamjo koima thuso/magazine in itahlang pih khahlou u ahin hijeh achu thuso khantou sahding kitihi nang leh kei khut a kingam ahin ahi.