Guwahati, Lhalam 27 (NNN): All Assam Students Union (AASU) in pungkal 11 sung Indo-Bangla land Swap deal toh kisai ja kiphin na  kibol ding atiu chu vahchan ni leh apat ding’u ahi tai tin thuso miho ahet sah uvin ahi.
kiloi khom na jat chomchom hon  hiche thu a hin a chesa nikho  sung ho a kiphin na jatchomchom in  ana bol uvin ahi
mipi ten hiche chung thu a hin solkar dem na sang tah apeu vin ahi ajeh chu CM tarun GOgoi lamkai nah a assam gamsung gambih ejat ham khat Bangladesh te ana peh doh u ahi

Indo- Bangla land swap deal deilou vetsah na in  All Assam Students’ Union (AASU) in pung 11 sung an ngol a kiphina assam in ahop sung district headquatar jouse a vahchan ni leh anei ding u ahi.

Sankar Prasad Roy, themjil chapang ho kiloi khom na a president pa hin asei nah a chun kiphin na hi  kiloi khom na 26 (26 different ethnic bodies)  toh kihou na kinei ding ahi.chuleh hiche kihou khom na ho a chu eti lampang a kiphin na kinei ding ham ti thu a kihou khom na jopng kinei ding ahi tin jong asei jin ahi.

Assam chief minister  Tarun Gogoi,  hin mipite eijou lhep uvin chuleh new delhi  thu thu a bou nung chuleh new delhi thusei nelkal ngam lou mi ahi bouve atiuvin ahi. Chuleh Gogoi hin Assam gamsung midang peh doh ding jong  khoh asa poi tin Roy in  aseiyin ahi.

Indo- Bangla land swap deal achesa Lhalam nisim 6 nikho a Dhaka mun’a prime minister Manmohan singh  in Bangladesh agavil chung a hiche kinoptona hi ana nei u ahi. Hiche kinoptona dung juiya hi  Assam gamsung 357.5 acres Bangladesh kipe doh ahi.

Hiche kinoptona akichai chaija pat a hi kiphin na kipan a ahitai. Opposition political parties, student bodies leh socio- cultural organizations chom chom in Bangladesh gam kipeh chung’a hi alunglhai lounau aphondoh soh keiyu ahi.

Hetthei khat chu, Prime Minister Manmohan Singh in Dhaka agavil achu Tarun Gogoi in akilhonpi ahin ahivang’in hiche kinoptona hi ana kham poi ati. Gogoi India ahung lhun jouvin mipi ho kom’a sorkar thilgon hi Bangladesh toh gamgi chung chang’a kihet them louna ho suhtup ahi theina ding’a kibol ahi, chuleh New Delhi in Bangladesh toh  amani kikah ahi.

Assam sung’a hiche Indo- Bangla land swaps deal  kinoptona jeh ahin Assam sung achesa nikho ho a boina tampi a um tan ahi. Chuleh Congress vaipo ho jeng  jong alung’u aboiyin, opposition hon hiche kinoptona adem  nau hi lethuhna in Congress sorkar in jong mipi ki khopkhom na tampi a gong uvin chuleh mipi ho hiche kinoptona hi hilchen na apeuvin ahi. Congress in election achu seat 126 lah a 78 ana mu ahi.

Imphal, Lhalam 27: Sadar Hills hopsung Salam Patong hill mun’a tunia “Thazing-Lap” celebration 2011 kiman tolhon’in Vaiphei community in achesa thusim geldohna aneikit in ahi.“Thazing Lap” kiman nahi Semtil apat Manipur sung’a Vaiphei community ho ahung chenna vetsah na akhang akhang’a hung kimang ahi tin AMCO president Rev. S Prim Vaiphei in hiche kingon a ahoulim na achun aseiye.

Gollui lai chun “Thazing Lap” hi lha 3 cheng ana kimang jin ahi. Pu leh pate hon masang’a Kulbung veng kiti tua Salam Patong a dettah a kho chen ahin sem jou uva Vaiphei community in hiche hi ahin manpat ahi tin Reverend pun phondohna aneiyin ahi.

Kulbung veng akon Vaiphei chelhah ho state sung mun tin’a ahung kithe thang uvin hiche tolhon chun tuni kho hin kho 30 tobang’a a kho sa uvin ahi ati.Reverend pun geldoh kit ding’a thusim aseina achun, Vaiphei community hohi Chin Hills (tua Myanmar) akon hung kondoh ahiuvin Manipur a leng Gambhir Singh vaihom laiya Manipur gam Natok a hung kichon lut uva hiche akon’a chu NH-150 lamlhong Mahadeva a ana kichon u ahi.

Phatchom khat jouva Manipur lengpa in Mahabali mun’a ahin tollut uva pasal hochu sepai ding’a thupeh ana neiya chuleh numei hochu toltheh ding’a ana sei ahi. Ahin Meilhei kikisoh in te tin Vaiphei hochu Mahabali akon ana jam mang uvin Kulbung veng a ana kho sa uvin ahi tin Reverend pun aseiye.

Kulbung Veng chu phatchom khat jou 1830 kum’in Manipur official gazette a hetpeh na ahung umtan ahi.  Tiddim gal achun Maharaj Chandrakirti (Ngameingam) Kamhao toh kitho in kho miho chu Burma sepai hotoh ana kisat uvin ahi ati.

Kho chu phatchom khat jouvin Kulbung veng haosa Pu Patong geldoh na leh hetjing na ding’in Salam Patong ana kisah in ahi.Kho kisatna mun dihtah chu tunin masang’a Pu leh paten ana tun song hotoh achang’in mol a umtan ahi.

“Thazing Lap” kingon achun, Jin-gun in commissioner co-operation, Pu P. Vaiphei IAS a pang’in chuleh Avella kho miho, simlai ho, haosa panna in loupitah in akimang’in ahi.Jin-gun hina a commissioner co-operation, Pu P. Vaiphei IAS in ahoulimna achun, Vaiphei na mite thusim a hetheitah “Thazing Lap” kiman na pan ana lahdan ho aseiyin ahi.

State sung mun chom chom a cheng Vaiphei jat miho jousen “Thazing Lap” hi kilungtoh tah a tosot ding’in tepna aneiyin chuleh hiche akon jat leh nam chondan-khandan chin jing ding’in temna aneiye. Hiche chung chonna kingon hi kho nung teng loupitah leh thupi tah a vannoi mi hettheiya akiman doh theina ding’a apan na thei chan’a pang ding’in kitepna aneiye.
Tunia “Thazing Lap” kingon hi Salam Patong village authority,  Zillai eastern block leh Salam Patong Sporting Youth Club kithokhom na noiya kimang ahi.

Loupitah leh guntah a kimang “Thazing Lap” kingon achun Salam Patong Sporting Youth Club akon “Thazing Lap” lam vetsah na aum’in chuleh chapang hon lasah na anei uto lhon’in Thanza Youth clubs in Pu lam pa lam vetsahna anei uto lhon’in kingon khum khana ding’in mipi hon ann-neh khomna anei uvin ahi.

Imphal, Lhalam 27 (NNN):

BJP national convener Sunil Deodhar in vision document 2025 asodoh nauva chun, BJP in Manipur hi India golseh tolpi (sporting capital) hisah ding lunggel anei dan aphongdoh in ahi.

BJP national convener-in-charge of northeast India Sampak cell Sunil Deodhar  ni 3 sung state vil ding’a Sempatni (Monday) achu Imphal tolpi hung lhung ahi. Chuleh akilam teng Manipur a boina sang tah aum dan thuhi BJP national president Nitin Gadkari ahet sah ding ahi.

Aman thuso miho kom’a aseina achun, Economic blocade jeh a mipi ho genthei hahsat  naho khol toh a hung kahin chuleh vision 2025 a tohgon ho jong mipi ho henga phon dohding kadei jeh a hung kahi” ati.

Chuleh vision 2025 dung juiya hi Manipur hi India sporting capital a sem doh ding akideina ajeh chu Manipur a khang thah ho hin kichep golseh lam a  mi tet phah na thei  thepna anei uve ati.

Chuleh aman aseibe na achun, Manipur a mipi ho gentheina hi asang tan, chuleh  central a pat kithopina ema cha amu lou hi apoh nat na jong aphong doh in ahi. Economic blockade a um kal nikho 58 alhing tan umbe nalai ding ahi chuleh bazar a LPG cylinder man dangka 2000 a phah hi lungkim lou na jong a phong doh in ahi.

Deodharin aseina achun, Manipur a mipi ho genthei naho jouse hi  Prime Minister leh President  kom’a jong  jih tho a hetsah na kinei ding chuleh central jong hiche mipi ho genthei na hi aganna thei pen a asuhlhap na ding’a ahung kikum lut na ding uva jong kisei ding ahi ati.

Themjil chapang ho jong hiche bandh hin hatah in atong kha in chule kolphe meivah(electricity) jong aduh dah pon, Don ding twi( portable drinkng water) gei jin mipi aboi gam tai atin ahi. Manipur a mipi ho genthei nahi asang mong mong tai tin BJP national convener chun aseiye.

Chuleh state sorkar hi suhlhuh a president rule umsah ding ahi tin jong aseiye. Vision 2025 a hin Manipur a gamdang mi hung cheng lut hohi kholchil na nei ding chuleh gamsung a kivai poh dan jouse jong hi suhtup a aum na ding’a  jong pan nasatah a lah ding tohgon akineiye. Chuleh state sung’a hi train jong 2025 kah a lhunsah tei nading’a jong pan kila ding ahi ati.
Aman aseibena a, North East mi hohi India sung lam’a ache teng uleh mihon abolgenthei jiu vin hiche hohi a um louna ding’a jong pan lahna thei chan’a panlah ding dan jong akigel e ati.

Chuleh hiche hi tobang a kivet set naho aum louna ding’a hi lhangphong a mipi lah a North east ho jong hi India mi ahi dan u kiphong jal ding chuleh hiche akon’a kibah louna [facial (racial) variation] jeh a kivetset naho hi mipi te lungthim a kon kithai mang ding ahi ati .

BJP national convener Deodharin hi Lhalam nisim 29 teng Tulihal Airport akon Manipur adalhah ding ahi.

Imphal, Lhalam 27:

Mera  Chaoren Houba kiman ding tolhon’a Manipur mipi jouse Governor, Gurbachan Jagat in liem na aneiyin ahi.Hiche golnop hi Manipur mite ding’a golnop loupi khat ahi. Chuleh hiche golnop hin mipi ho jouse jat le nam khen tum umlouva achen khom jing nao vetsah na a kimang ji ahin chuleh hiche golnop ahung lhun kit tolhon na, mipi ho jong gamsung’a kipumkhat leh kingailu tah a achen khom jing uto lhon’a achen khom jing peh diuvin jong akinep na aphong’in ahi.Hiche golnop hi lolhing tah a akiman nading’in jong akinep na aphong’in ahi.

Aizawl, Lhalam 27 (Newmai News Network): Mizoram a thuso (media) holeh police ho kisam kaina sem hoina ding’a nasatah in natoh akipan tan ahi.

'Media Relations during Crisis Situation' ti thupi a mangcha a ni 3 sauva kichuhna kingon (three-day training programme) khatna Mizoram a police director general (DGP) Lalrokhuma Pachuau in security forces officers ho kom’a ahoulimna a, gamsung boina hatsat na aum teng thuso (media) holeh police hon hoitah a pan alahkhom theina ding’a ama ni kikah a kisam kaina ahoiding akhohdan aseiyin ahi.

Mizoram police department holeh Indian Institution of Mass Comunication (IIMC),New Delhi kithokhom na noiya kibol ni 3 sauva kichuhna kingon chu tunia Aizawl khopi a ana kipan ahi. Mizoram police chief in aseina achun, tulaiyin vannoiya thuso (media) hi thunei tah ahung hitan hiche tolhon’a chamna leh lungmon aum theina ding’a uniform a kivon ho nasatah a akithopithei ahi tin aseiye. “Gamsung’a boina aum teng police hon thuso (media) lamdot ding dan ahet uva chuleh mipi ho kom’a ipi sei ding ham ahilou leh ipi bol ding ham tichu ahet ngai jeh a police hon gamsung’a boina aum teng kimaitopi ding dan ahetthem na diuva thuso (media) hotoh kisamkaina semhoi na ding chung chang thua kichuhna kigong ahi” tin aman aseiben ahi.

IIMC senior-most professor KM Srivastava in ahoulimna achun, Police forces ho ding’a hitobang kichuhna hi gamsung pumpia ana kibol ahitan chuleh tutua Aizawl a kibol hi 22nd channa ahitai ati. Chuleh media hohi achang seh uva akivetup jou tapouvin hiche tolhon’a police hon thuso (media) hotoh kisamkaina phatah aneiding apoimo ahi tin aseiye.

Police officers training programme achun IIMC Special Officer (Mizoram) leh CM,LR Sailo Press Secretary jong apang’in ahi. Hiche kichuhna achun Mizoram Police department akon officer ho, chuleh state sung’a Assam Rifles, BSF leh CRPF akon officer ho jong apang uvin ahi.

Hiche kichuhna kingon nahi Prof.KM Srivastava, IIMC akon Visiting Professor Gopal Mishra leh NDTV correspondent Arvind Uttam Resources Persons a pang diu ahi.

Shillong, Lhalam 27(Newmai News Network): Achesa Lhaphul (May) nisim 31, 2009 nikho a  Shillong jail sung’a kon  ana jam doh ho thu kholchil na anei na Justice S.P. Rajkhowa makaina noiya ngansena kipe commission chun sorkar kom’a hiche thilsoh chung chang kholchilna ding’a phat kitep chon belou ding ahi tin Leisemni (Tue) chun aseiyin ahi.

Hetthei khatchu, hiche nikho a ana jam doh holah achu gang  mi 7 panna a alamkai pao Full Moon Dhar jong ana pang’in ahi.
Commission  in aseina achun, Ngo holeh sorkar chu phat tampi hiche thu ahin lhut na ding uvin aki petan ahi. Chuleh Ngo kiloikhom na lenpen “Steering Committee Against Murder of Democracy (SCAMOD)” in hiche commission hi jihtho in inspector hiche thu khol chil a ki nganse pa hi akimu piding uvin angeh in ahi vang’a commission in  hiche thu khol chil na ding phat vang kipeh be talou ding ahi tin aseiye. Chuleh hiche commission in asei nah a chun phat kipeh be a aphat chom na ding ema cha a umpon   chuleh phat kipeh be leh mipi te kinel kal na sang tah jong hung soh jo ding ahi tin aseiye.

Tuni a hiche thu a kihouna kichaiya SCAMOD  lamkai  Agnes Kharshiing in thuso miho ahet sahna achun, NGO hohin Police Superintendent, M K Singh, kihai sahna chung’a hin lungkim louna akineiye ati. Amahi hiche thu asolai  pet a hu Jaintia Hills a SP ana hin chuleh ama hi Fullmoon Dhar gang ho ajam doh jou uva kikap tona a jong chu ana pang ahi. Chuleh hiche kikapto na achu Full Moon Dhar  chu ana kap lih uvin ahi ati.

Kharshiing in thuso miho ahetsah na achun, athipa Fullmoon Dhar longdamsa kholchil na nivei ana kineiyin ahi. HS Diengdoh Magistrate First Class  in nidan 2.30 pm. vel in kholchil na ana neiyin chuleh Sub Inspector R.A Sangma  lamkai na in jong ana ki kholchil kit in ahi ati. Chuleh hiche kholchilna kinei pet a hin hiche police supretendent pa hi ana pang’in ahi ati.

SCAMOD  lamkai Kharshiing in aseibena a,  hiche police officer pa hin Sangma  in thu khol na anei pet in apang lou dan in aseiyin chuleh nidan 2.30 p.m vel a Diengdoh in athu akhol chil pet a bou ka um’e ati. NGO hohin hiche commission kom’a chun  Sub Inspector Sangma jong hi athanei na jouse lah peh ahi na ding in ngeh na aneiye ajehchu hiche thukhol na anei pet a SP pa hi pang ham? pang lou ham kihechen ding chuleh thu khol na ijat vei kinei ham? ti hetchet hi ding ahi ati. Hiche chung chonna SCAMOD in DGP atohmun akon kichondohna chung chang’a lekha tahdoh a pang Dealing Assistant pa leh athipa sang khol jong Court a pohlut din aseiyin ahi.

Shillong, Lhalam 27 (Newmai News Network): North Eastern Hill University (NEHU), Pro-Vice Chancellor David R. Syiemlieh in aseina achun,  Assam Tezpur University hin Puchon-Pachon  sim na lam’a hatah in khangthah ho ahin thanop sah kit in ahi. Hiche university hin Assam sung’a mipi ho chondan bou asim hilouvin North east sung’a cheng nam ho jouse chondan ho jong ahi ati.

North Easter Hill University noiya department of culture and creative studies in ‘ Semiotic and Folklore”  ti thupi a mangcha a seminar abolna a hiche hi asei ahi. Syiemlieh in aseibe na achun, Puchon-Pachon hi India a university ahung kisem doh a pat a hung kisim pan ahitai ati.

Aman seibena achun, India in chamlhat ahin mu jouva pat in lekha sim sang khangthah holah a hiche tobang a Puchon-Pachon sim nom na lung thim ana um jing in ahi ati.

Thildang tohdi khoh tampi atoh masang’a Syiemlieh hi professor anahi e. Aman ahoulimna achun, British sorkar in India ana toupha laija chun Puchon-Pachon ho kholtoh na ding’in commission tam tah ana semdoh in ahi. Adeh in North east a cheng thinglhaang mite thusim  ho lekha  bu a ana jih doh uvin ahi ati.

NEHU noiya Department of Culture and Creative Studies a luboh (Head) Desmond Kharmawphlang  in aseina a Puchon-Pachon thusim hohi 19th century khang laija ana kisim pan ahitai. England leh   Germany a ahung kipan Norway, Sweden leh Finland ho a jong ahung kipeson ahi.

North east gamsung’a cheng ho hin Chondan-Khandan haote ihiuvin chuleh hiche i-chon na houhi mansah louva i- chin jing u angaiye atin Kharmawphlang in aseiye.

Washington (United States), Lhalam 27 (PTI): Texas akon American lawmaker khat in US in Pakistan panpina anei jouse suhbei na dingin House of Representative a bill No. HR 3013 chu apodoh in, ijem tia phatsahna aum'a ahile nuclear venbitna tailou adangse'a chu kisubei ding ahi.

"Pakistan gam Abbottbad mun a Osama bin Laden akimudoh apat Pakistan hi tahsan thei lou khat a um ahitai. Chule US dinga kichat umtah in jong apang'e" tin Congressman Ted Poe chun aseiyin ahi.

Pakistan in galguh bol ho douna dingin kumseh le US akon billion dollars tampi kithopina amu jingin, hinla atohdoh het thei ima aumpoi. Hiche jeh achu US in apet petna hiche (kithopina) chu angah ding angaiye, tin jong Poe chun aseiye.
Poe hi House Committee on Foreign Affairs a member a pang ahiye.

Kolkata,Lhalam 27: Prime Minister Manmohan Singh in Lhalam(Sept) nisim 29 nikho teng Sikkim a ling(Earthquake) kiho na mun ho agavil ding ahi. West Bengal Chief Secretary Samar Ghosh in thuso miho(Reporters) ho kom’a aseina achun, Delhi akon na PM in Bengal north a Bagdogra ajotpa ding chuleh Gangtok ajot ding tin aseiye.

Lamka, Lhalam 27:

Churachandpur District Students' Union(CDSU) leh Churachandpur District Joint Philantrophice Organisation kithokhom'a Churachandpur District Hospital mun'a M.O Specialist,Technical& Non-Technical staffs, leh Casualty pilhin sah ding leh Power Supply ninglhing tah'a District Hospital a damlou ho vetkolna ding’a Manipur sorkar kom'a avel vel'a ngehna lekha akipeh jou nung’a jong Manipur sorkar in nahsah a akoilouna loujeh a achesa Lhalam nisim 20 nikho apat Churachandpur District sung'a um Government Office ho ana kikha sah tolhon'a Lhalam nisim 26 jannikho'a kihoulhah na anei utoh kilhon tunin Govt office jouse angai a bang’in office akaikit taovin ahi.

CDSU in ngehna anei hou chung chang’a in tuni nilhah lang nidan 1:00 chun District Hospital mun'a Pi.Jacintha Lazarus IAS, Deputy Commissioner, Churachandpur, Medical Officer District Hospital, CDSU leh Joint Phinlantrophic Lamkai holeh T.Phungjathang Power Minister hon Kolphe meivah pehdoh na mun ding leh meivah chungchang thu seikhom na anei uvin ahi.