KUKITE SAHNIT NIKHO
Black September 13

Pu Dr. T. Lunkim, Inpi Thumop

Kukite puchon pachon dolin, agam gama chom jep jep um jeng jongleh, mihem thina hi lamnin akikhenin, (1) nat le sat’a thi chu thipha akitin, (2) gal le sahang tha chule kitoh khah-na (accident) a thi chu thise akiti.

Thipha a thi chu leitola kivuiya akivui nikho ajing leh Selnit kitia, khosung mi vaikon natong louva, pul kidoupi ahi. Thisea thi vang chu insunga jong along (thilong) kipulut ngailou, vuibouva kijam a/ khopama kivui, chule akivui ni ajing nikhoa chu Sahnit kibola, loukon natong um lou-va pul kidouvah ahi.

Selnit le sahnit kibol hi jabolna ahin, chule athite insung lhamonna jong ahi. Sahnitna kibol hi mihemin ajeh beiya atha ahiya, atha jeh chu Haosa upan thu asei chaiya kicham-na aumdoh tengleh akichaiya kikoi ahi.

English paova September 13, 1993 Black Day tia nampin sah kinit hi, February 10, 1996 nikhoa chu, NSCN(I-M) Tangkhulte lamkaina noiya Kukite monabei nunao chapang, numei, tehse voise dem lou, mitcho elbai geiya mi 900 val athau, chulej nikhat sunga atam thapen niu September 13,1993 nia Aimol (Tamei) a pasal 87 chule Gelnal khoa 17, agom a Kukite 104 kitha ni chu atha jouse gopsopa Sah- nit kibol peh, chule athi ho thu seitohna aum kahsea kinit jing ding ahitai. Mihem hijat, monabei kithat chu phat khat leh agu thou thei ahijeh a, seitoh a, agu thosah louna dia akidoh leh United Naga Council toh kihou dia asei jeh-un, March 29,1994 chun UNC leh Kuki Inpi akihouvin, April 4,1994 man kihouna aum kitin, ahinla NSCN(I-M) hon akha jeh-un seitohna aum theipoi.

Mithat hon seitohna ding aholuva seitoh a champi akisat kah a hiche nikho hi sahnit nikho kimang jing ding ahi. Hijeh chun akho khoa Haosa le Houbung lamkai makai na noiya hiche September 13 nikho hi ajeh beiya kithat Sahnit nan mang cheh-ute. Akiman ding dan chu nahitheina lam cheh a nabol theiyu, English chonna banga intin a ponvom khaid-oh a, ponvom sila, kikhop khoma, lhentum lamkai khatin,

Tah chapa, Vo Kuki chanu, chapate !

Pathenin mihem a nasem a Nakihuhna ding tha Ihingset napeh a; Nakhut kisom la ahipon, Nakeng kikan la ahipon, Ibola hitibep a thi nahim?
 
Aban a chu

Vo Kuki chanu chapate !
Nalha namui sehih-in,
Nakom a kaum louva nabolin najo ahitai,
Tah chapa, Hat in pao hihjong leng,
Oh kaden, nakom a uming,
Ken jong khat beh seiyin bol tah tang
Oh Kaden kasopite!
Tia asei jouleh, dahpi voh/chup a, mipin lhahna La sah-khom ding
Tindalgin nguijenjen’e
Vo, palam lema pelthei lou
Lungjin muikho thim jongle,Jopa hanmininsel ute !

Gosem Archive , Lhalam 13, 2010