Tulah Sadar Hills district pilhin hisah na dinga kiphinna umhin japi niseh kimanchah na hinkho atongkha lheh in ahi. Hinla hiche gentheina hi koima chom in athoh gim dehset dinga kibol vang ahi louding mijouse hetthei khat ahi. Hinla kivaipoh nakhat a gamsunga lamkai hon hiche gentheina lhaplha ahithei nadinga panlah na anei hohi ipijeh a kisei kibol ahidem tihi igelleh lungdon umtah thilkhat ahi. District demand committee a lamkaiho matding thupeh kilha hohi igelleh alangkhat na geldin adao jep in akhohna aumpoi tin akila theinai. Ajehchu phaicham hokeu ahipon Sadar Hills district hopsunga cheng mijouse jong hatsatnan alhutkhum jeh a mipidi gelkhoh najal a kibol ahi atiuchu gelthei ahinai. Hinla Sadar Hills district thumna jeh a ipi atileh hiche district hopsunga meithal licence neijouse chomkhom a police station hoa koiding kiti lunggel kinei ahidem? Iham tia Sadar Hills boina sunga gimneitah a panlahna neiho mi nute le numei chapanghon kiphin umsung a hem le thal adop uva gari ho ahallhah ahile vang bol uhen akhohpoi, ahinla thingkeh le moltum kiput a sepai manchah phatah choiho atinji bou u ahin chutitah a meithal licence donkhom nathei husan ahipon ahi.
Tollhanga ann-ngol kiphinna umna sungleh numei chapang kisuh khahna hopsunga meithal lontup ding kisei ginghi meisan jehjong hinante hinla achombeh a seidin thil phaloutah lunggel umjeh a jong hithei ahi tia mipin agelthei ahi. Sadar Hills hopsunga cheng jat tamtah lah ahin Kukite atamloi ahi. Masang Pu le Pa te thusim ihetma bang uvin Kukite hin meithal semthu local made a pansa Sapte kisan ana kisat ngapchat piu ahi, Hichun avetsah chu Kukite hin tua licence kipe cartoos le double bearer gun hobanga kapdoh nathei manchah asemthei diuchu tahsan ahi. Hiti ahijeh chun licence lahpeh le lahpeh lou thuhi kiseiging tahih leh phat najoh hiding ahi. Hiche district thua avaigei natheichan kichep na a hem le thal kipan hi lunggel umbeh setlou lamkai thulhun khat ahin aban chepi loudin aphai.
Aphat ageisang channa huinun kikhel cheh thei ahin lunggel lhah loiding apoimo lheh in ahi. Sadar Hills keu ahipon hoilai hijongleh mipi hon kichentah a kithutoh tah a lunggel achepi hi nahsah moa akikoi khahle vang vangsetna chun alonvuh ding ahi. Hijehchun tunjong Sadar Hills thuhi seichai phat ahitai achuti louva ahileh kum 40 vallang kiphinna umsa ahitan tuchung hi ipi hamkhat akisosah loule mipi hung lhase khading ahi. Iham tin Sadar Hills district bou thumna a bon hichan a thangthipna umhi Manipur gamsunga iki khailhah nalo akan natna aumpoi hisang chun Kukite chenna jouse kivaihopna thakhat kisemdoh taute tin lunggel hungnei khaleu tua dinmun sanga boijo cheh ding ahi.
