Imchep umlou hella seiding chun Manmohan Singh prime minister kaidoh hi tosoi ahibouve. Phat sottah pihi commerce minister thumop’n apangin, emergency anapom jeh in kipa mannin Prime Minister Indira Gandhi chun ama economic adviser’n apansah in, planning commission deputy chairman’n apangin, finance secretary’n apangin, RBI governor ahin chuleh finance minister anahi e. Sonia Gandhi dinga amideilhen tahchu anahi khan ahi. Amahin thu angaijin, atohkhompi hon politics a jungkhona neilou, constituency behjong neilou tia nombol thinna a aneikhumu jongleh khoh asapon, chuleh itihphat hijongleh atoumunhi lhadingin phasa demsan aum jinge. Sonia Gandhi hin PM nahina lhatan tileh, khungai tadi tango! tihihbeh inte.

Aboina tahchu, Manmohan Singh hin India economic reform abolle tia ihetnu jonghi thujou ahibouve. Misei kijason dung juijin, 1992 kum’a Pime Minister, P V Narasimha Rao’n economy semhoi nathei budget hinsem’n atichun, Manmohan Singh hin kumdanga bangin budget ahinsem kitnin, Rao chun lunghangtah in budget chu dokhang chungah aseplhan, bollin kati bangin bollin – gamdang company hotoh akitet theina dinga India company ho ‘licence-permit raj’ kipehi noimangin lang India economy hi leiset chung globalizing economy toh jopmat kigon atipehtai. Rao chun abolkha lheh jengin chuleh Manmohan Singh hin minthan na-in aneilotai. Geldoh ding khatchu, kum sagi prime minister ahi sunghin 1992 a economic reform kibol laija sangin India hi akaltoupi bepoi. Kitepna aneiho donda tadi leuhen, China ten abolbang uva India haosatna suhsangna dinga aboldoh hi muthei aumpon, second stage economic reform jengjong abolpoi. Min hiti a nabolding ahi tia thupeh aneiteng lebou abolhoi jin, ahinlah tuhin alam kopeh dingin Narasimha Rao aum tapon, Sonia lamkaina a National Advisory Council hinlah kikheltah a thumop ding anei pouve.

Prime Minister touna a itousahpao Manmohan Singh hi alhah samjeh hin, India sorkar’n policy asemho jonghi a elbaitoh abangin, phatah a ajotna mun lhungjou akikhatne. Manmohan Singh thahatna/boltheina ipiham? Amahi mipha ahin nehguh-lahguh abolpoi. Achunga anen behlou tinjong akiminvo in ahi. Hichi minphat nahi ama a bou ahin, koiman chudoh ponte. Ahinlah, India prime minister hina dinga hichiseh hi lhingjou ding hinam? Amahin, economics langa thepna sangtah anei vanghin economy khantou sahna dingin ima abolpoi. India hi economy langa thaneitah hisah ding itileh lampi dang aumpon, Capitalist economic lampi jang jella juiding bouhi ahi. India ngaman miho twikhanglen’a Sri Lanka Navy hon amohtha thao jongkhu prime minister lhahsamjeh ahi tin Manmohan Singh hi mi tampin oimona apen ahi. Vannoija sepai haoloija kisei India ngamanho gamneo chakhat Sri Lanka Navy hon aphatseh tobanga athaohi centre sorkar lhahsamjeh ahi tia agellouje aumpoi. Foreign policy a jonghin sorkar hin suhkhel tampi aneije – Libya gam’a thudih loutah a vaihom Gaddafi douna a lhumlam gamho bolbanga vote alhah nomlou, Arunachal Pradesh gamgi chin’a thuboi ahetdohlou, adeh a China ten Brahmaputra vadung twi akilah lutnu, Arunachal a minister khatnin gamgi a hi ‘Kargil’ tobanga boina hung umding ahi tia ahilchahna angailou hohi ahi.

India sorkar hin thil thupi bolmasah dingleh bol nukhah ding alhehkhen theipoi tihi Finance Minister, P Mukherjee’n Delhi huikong ngahmuna Ramdev lamto dinga ache a chu mudohthei ahi. Theitopsun asovang uva Ramdev ajollhah joulou phat uva police ho agoiju ahi. Finance Minister pahin Ramdev agalamto sanga gamsung economy boinaho – thilman kal leh adangho joh akisahlel pi a phajo hilouham? Boina neokhat aumleh sorkar’n committee asem jing jonghi thangtom umtah ahi. Tudeh deh hin PM hi nehguh-lahguh leh anoija lamkaiho kito louna hohin achup khumtan, India Inpi a thalheng isol houkhu koiman atahsan tapon chuleh amaho jong alung neogam taove. Amasang laitah a nehguh kimandoh aban abanna akitahlang jenghi PM lhahsamna avetsah hilouham? Sorkar alangthi tobanga aumhi jendam ahiding muphah in aumpoi. Congress sorkar hin neldi lah a kivuilhum dannin min amutai. Ramdev leh anung juiho aboldan uhi ivetleh, sorkar hin sottah chelhah pithei policy semsanga agalmi a agelho bolchah jengding joh hi akhohsah dan mudoh thei ahi. Thaneina tahbeh Sonia’n achoija aminmai maija Manmohan Singh akitun jonghi aboinatah khat ahi.

Iba lo a pha hitam? Manmohan Singh ngailu mong-mong hochun, mi lungsetna themkhat nanei nalai sunghin haitan tia aseipehdiu ahi. Phat hungche sotleh boinahi hungkhoh cheh-cheh ding ahi. Anoija minister phabepmin Rahul Gandhi hi prime minister a pansahthei ahitai tia aseilhih-u thucheng khu chihtheina a aneidin aphai. Lhangphongtah a ahinsap masang uva a otdoh dinghi ama dinga damna hipen inte. Kum ijat toube jongleh achamtah a vai ahop nading thu aumpon, chuleh Congress neihohin vaihop nahi akhutna apehlou heldiu ahi. Midang prime minister hileh kisuh tante tina hilouvin, PM kihi a inuoi douhon anopdan dan uva eibol’a, mijousen thaneilou prime minister tia einuisat jing sanga, haidohchu navahjeng louham!