To

The Editor,
The Gosem Daily

Ja umtah Pu Editor,

Amasa’n Thadou-Kuki pao va niseh thusoh i nei sun’u, ‘Gosem’ hoitah a nahin bo jal’un nachung’uvah kipa na sang tah kahin phong’e. A kipattil chun ana hoi beh pon hinla ngailut na jal’in kana la’n, phat a che dung jui in a hoicheh cheh in, thusoh jong a tam ta’n, a coverage a hoita’n, pao dangsang’in hoi kasa lhehtai. Hinla a hoicheh na di’n ngaidan ni ka hin pe nom’e.

Khat na: Thusoh api lhin le lhinlou hi Editorial ah aki he’n ahi. Hijeh chun Editorial hi tusang’in hin bol hoi deo le’u chun phalheh inte. Thusoh jouse’n chepi, doi le tup anei ahi toh kilhon in eiho a jong hin nei thei leh dei a um e. Current issue ho a Editor ngaidan ho leh adeh a nampi natoh (National Movement) i nei lai’u ahi toh kilhon’in sim le mar (gamdang) thu ki sei jongleh eiho atoh seimat/seitha jing di phante. Chuleh nampi khonung ding i boipi laitah u ahi toh kilhon’a lhangpi kisemphatna (social reformation) lamthu hi hatah a editorial a sei jing phante. Chuleh article khat veivei leh sappao a um ji hi akhoh pon editorial a vang sappao a i jih ji’u hi bol lou tei phante. A jeh chu Editorial akon’a hi thuso hi Thadou-Kuki pao’a ahi ti ki hetna khat ahi ban’ah a sim ho hi i mi/i sa ngen ahin, sappao helou hon jong a sim ji ahi jeh in. Vetsahna’n Indian national movement lai in jong Vernacular Newspaper tamtah ana um in hiche ho chu national movement kithopi phatah le lhangsam (mouth piece) in ana pang’in, hiche bang’a chu Gosem jong hi Kukite ding’a Nampi Natohna kithopi phatah a a pan ngai ahi. Pan jong pang jing mong ahi nai.

Nina:  Gosem a nung phengmai a sports leh entertainment ho khu a tam/a sao thei behset naban’ah a lim a tam val in mun a lo beh e. A peh a hung tam teng leh vang a khohpoi. A deh in entertainment column a niseh leh numei sagoh keo tobang, noibaal doh peetput, to doh dehdeh ho a jao jing jong khu a hoimo behset e. Abang leh numei le pasal kichopna/lupkhomna lim jong a jao ji in a phamo lheh e. A jeh chu i thuso uhi i chate hon jong a sim ahijeh in chapang ho lungthim ahi lou lam a puina khat in a kilang’in eiho thuso natoh ding in a kilom poi. Tukal hiche ho hi umda tei leh dei a um’e.

Kahin lekha thot hi nam ngailut najal leh adeh a GOSEM kiletsah pitah a i neisun’uhi ngailutna leh a hoichehna ding’a ka lunggel kahin sei ahin, ahilou lam’a neina lah peh lou din kahung tao ve.

Nam ngailutna jal’a na natoh na’u Pathen’in phatthei na boh jing ta’u hen lang Gosem hung machal jing ta hen, damsot hen.

Gosem ngailu,
M.V. Haokip,
Tuibuong, CCpur