Kanggui, Lhalam 19:

Tuni Sadar Hills District League kichepna’a Pangjang Youth Club, Muvanlai Athletics leh SC.Laogas in goljona aneijun ahi.Kichepna masa’a, Pangjang Youth Club leh NINOU FC ana kichem’in Pangjang Youth Club in 4-0 a NINOU FC ana jouvin ahi. Minute 17 in Pangjang YC lang’a Jersey No.17 Sehlun in Ninou FC lang’a goal khat ana khum’in ahi. Minute 42 in Lamminlen Jersey No.7 in goal khat anakhumben Pangjang YC ten Ninou FC chu goal ni in ana makaijun ahi. Phat kichai konlam minute 57 leh 58 in kijom’in Pangjang YC lang’a Jersey No.22 Thanglenmang leh Jersey No.21 Satgoulen in goal khat gel anakhumbe kitlhonin NINOU FC te chu goal a ana joutauvin ahi.

Kichep anichanna’a, Muvanlai Athletics in Saikul Hill Town 2-0 in ana jouvin ahi. Minute 36 lhinin Muvanlai Athletics lang’a Messi bang’a goal khum themtah-a kihe Jersey No.5 Ginkhansem in Saikul Hill Town lang’a goal hoitah khat anakhum’in minute 45 in Thangkhosem Jersey No.10 in goal khat ma anakhum kit-in ahi. Hiche hi Thangkhosem ding’a tournament sung’a a goal masapen ahinalai jin ahi. Ginkhansem ding’a tunia a goal khum hi tournament sunga ding’a a li channa ahitai.

Kichep athumchanna’a, Sahei SC leh SC.Laogas in kichep vetnom umtah le kithuhtah ana neilhonin ahi. First half kichaiding kon minute 25 in SC.Laogas lang’a Jersey No.12 Lalneo in Sahei SC lang’a goal hoitah khat anakhum in kichep kichai konin goal khat’a ana makaijun ahi. Minute 53 don’a SC.Laogas defender pan Sahei SC striker pa D box sung’a anahel lhuhkhah jeh-in centre referee pan penalty anapen, Sahei SC lang’a Jersey No.13 Seilen in apeh-in hoitah in lethuhna ana neijin ahi. Phat kichaikon’a goal khat khat-a kibahna aneilhon jeh-in alang lang’a hatah-in akinoto lhonin ahileh Minute 58 in SC.Laogas left winger pan passing naltah-a ahin kai chu Thangneo in aluchang’a hoitah-in Sahei SC te goal sung’a ball chu anatat luttan ahi. Hiche hin SC.Laogas te goljona anapetai.