Kanggui, Lhalam 25:
Achesa Lhajing (Aug) nisim 16 nikho akipat Sadar Hills district pilhing’a akiphondoh nading’a Kangpokpi mun’a THICHAN ANNGOL hinchepi kum 43 a upa Pi.Kimjalhai Kipgen hatah’a analel lhahtah jeh-in janhi nilhah nidan 6:40 don’in CHC, Kangpokpi’a analhut tauvin ahi. Pi Kimjalhai Kipgen hi Kangpokpi Ward No.13 a khosa ahi.
CHC, Kangpokpi a ama vekol’a anapang MO Dr.Kamsat Khongsai in aseina’a, a anngol na asottah jeh-a lungvaina leh oisung natna hon aphah ahi. THICHAN ANNGOL akipat masangchun agihdan 60 Kg anahin tun Kg.5 lang akemtai. Chule a souphutdan jong minute 1 a 74 chu tun minute 1 a 68 in ahung nemsuh tai ati.Pi Kimjalhai Kipgen in adammona jalkhun chung’a thuso miho kom’a ahoulimna’a achun, katahsa lhahsam dan jong kahei. Ka dinmun jong tijatnan aumtai ti kahe-e. Ahin mihem’in ipi seihen lang boljongleh hiche ho’a chu nungchon ding kahitapoi.
Phatseh-in kaloiho toh katao jing uve, anngol’a ka taonau moh ahilouding katahsan cheh uve. Khatvei leh lamkai hodin katao uve. Khatvei le Sorkar dingin katao uve. Abangkom le mipi din katao jiuve. Chule Sadar Hills chungthu’a kisalel kagel phahchan hou ding’in katao jing uve. Pathen’in bolmo aneipoi ti itahsan’u ahijeh-in, ka taonau hi ka tha’u ahin, kahatnau ahi ati.Aman aseibena’a, mi tampin idoi itup’u isumil’un thilchom joh thupi jon igel tauve. I-lhunna diu mun ilhunkah uva idoi itup-u lamkah-a isuhmilpa loudiu aphai. I-lamlhunlou nadiu thil tampi aumin chingtheitah-a hinkho imanphat-u ahi ati.
Alangkhatna’a tunin lou le Ai po truck khat Kangpokpi mun’a eco.blockade tosot hon suboi louhel’a asoldoh nungun 43 AR Kangpokpi hon Kangpokpi bazar leh IT Road kah-a a check post uva jinglam nidan 11 apat anahen den-un nilhah lam nidan 5 vel’a anasolsuh bep-un ahi.Hiche truck driver pan the GOSEM correspondent pa kom’a aseina’a, Kangpokpi sahlang sang’a duty po hon eikhol uvin lou leh Ai thil ahi ahetchen phat-un, lamkah tuikah-a koiman nasuh boilouna dingin atiuvin volunteer mikhat jong eikilhonpi sah-un ahi. Ahin AR hon eina lamtin’un ka officer pau na nga diu ahi. Hiche kabol’u hi nangho ding gelna’a kabol’u ahi. Tunaicha chun NH-37 lang’a Counter Eco.Blockade tosot hon lou leh Ai po truck 3 anahal lha-uve atiuvin ahi ati.
Hiche thuto kisaija SHDDC Sub-Committee Convenor pan aseina’a, Counter Eco.Blockade tosot hon lou leh Ai poho ana hallha jongleu tuchan in vang SHDDC makaina’a chelhajing Eco.Blockade tosot hon hitobang thilpo gari ho akisuboi khapon chuche malah-in lamkah tuikah-a boina atolouna diuvin kithopina theichan’in aki kithopi jing’in ahi. Tunin jong hitobang machun boina atolouna diuvin volunteer khat panna in lou leh ai po gati chu akisol’in ahin AR hon ana tingden’un volunteer kisolpa phone jong analahpeh uve. Ahin nupi hotoh kitoh jou nung’in phone ahinlepeh un gari vang nilhah lam nidain 5:00 vel’in bou ana solsuh-un ahi ati.
Convenor pan aseibena’a, tunung tuban a jong Eco.Blockade akon’a kilha-ong tichu dammo veisetna lamto kisaija thil le lo, thuso lampangtoh kisai ho chuleh adang dang akive ho hinpo gari ho kisuboi louding ahi. Chuleh su jong anakisuboi pon, su jong kisuboi louding ahi. Amavang Eco.Blockade in aphatsahlou thil dangho vang kidemlou ding ahi. Hijehchun mipi ihetthem uva, itoh ibolna lam jou seuva lungkhattah-a ipankhom jing’u aphai tin jong convenor pun aseiyin ahi.
