NEW DELHI (India), Lhalam 26 (Zeenews Bureau): 2G spectrum thua Home Minister P Chidambaram jong apang’e, tia finance ministry in PMO henga lekha ana thit jeh a kiboina aum nachung a New York khopi akon ahung kile Finance Minister Pranab Mukherjee in Congress President Sonia Gandhi akimupi ding ahi.
Thulhut kimu chun aseina a, Mukherjee in Gandhi to kimuto nadin phat athum in, hichu nilhah 6 pm jou ahung hitei ding tahsan aumin ahi. Prime Minister Manmohan Singh to akihouna thu chu Sonia Gandhi hetsah ding chule 2G thua Chidambaram apang’e, kiti na jong chu ahilchet ding ahiye.
Pathenni (Sun) ni chun New York Palace Hotel a Pranab in PM ana kimupi a 2G thu ana seikhom lhon ahi.
Thulhut kimu chun aseina a, 2G spectrum to kimatna document um jouse chu Finance Minister in Prime Minister avetsah in ahi. Chule 2G lekha kithot chu Finance Ministry hilouva PMO akon a kisodoh ahi dan jong aseipeh in ahi.
2G nehguh a PMO panlahdan ho jong athah beh a hung kikhol ding ahi, tin Prime Minister gihna aneiye, akiti.
New York a akimuto lhon ding chu Mukherjee in agon na akon ahi.
Gampam a lamkai 2 in agamsung thilsoh asei nalhon chu thil kidang tahkhat jong ahiye. IMF le World Bank kikhopna a Washington a kholjin a che ahin, hinla ginchat louva New York a Manmohan Singh to kimuto ding ache jeng chu thilkhoh khat vang hiding ahi.
Prime Minister in 2G thua imcha asei nompoi. 2G hi gamsung thilsoh ahin, India kalhun teng lebou kasei ding ahi, ati.
