Imphal, Lhamul 19(Newmai News Network): Bishenpur district hopsung Naodakhong Makha Leikai community hall mun’a tunia japi kikhopna kingon achun mipi hon state sung’a hal man kalna chung chang’a agriculture minister Ph Parijat temmo achan uvin chuleh Communist Party of India (CPI) socialist ideology min’in mipi lamdih louvin apuiye tin ngoh na anei uvin ahi.

State sung’a thiman adeh a nitin’a ngaichat thil ho aman ahung kal teng CPI Manipur in mipi thanei ding’in pan alajin ahin tua CPI  akon agriculture minister Ph Parijat in lou lhou miho ding’in hal man sangtah tah in ajohsah in ahi tin kiloikhom na akon president Lousal L Ranjit chun aseiyin ahi.
Plain & Hill Development Organization chuleh Ithai & Wangoo Naodakhong Progressive Farmers Development Association tohgon na noiya japi kikhopna kingon achun mipi ahung kikhom hon japi thalheng’a mopo thei chuleh politics a hing hilouva japi khantou naleh machal na ding’a pan lathei lhen tah ding’in asei uvin ahi.

Manipur state sung’a kumseh in hall hah na dinmun’a aumjing’in ahi. State sung’a hal ninglhing setna aum theina ding’a tohgon nei angaiyin chuleh lou lhou mihon athanei nau bang’a hal ninglhing a amudiu angaiye tin aman aseiben ahi.

All Manipur Progressive Farmer Development Association coordinator Thoiba Konthoujamin in ahoulim na achun, state sung’a cheng mihem 80% hi lou lho a akingai tolhon’in hal ninglhing setna a umding hi 80% in agelkhoh in ahi. Lam chom chom’a kimangcha mipi jousen sorkar in tepna hal man jat chetna lou lhou mihon hal amudiu hi atosot uvin ahi ati.

State sorkar in lou lhou mihon hal man bag khatna dangka 650-700 a amu uchu dangka 520 a amudiu ahitai tia thuphon tampi aneivang’in imacha aphachom pon ahi ati chuleh sorkar in sumkolvei ho kichepna dingbep a pan alah na chung’a aman gihna aneiyin ahi.
Constituency jouse a bag 200-300 bep in sorkar in ahom’in hiche hi lou lhou mihon 1 angaichat bag 2-3 a ninglhing joulou ding ahi tin aman aseiyin ahi.

Sunil Karam in japi kikhop khomna kingon’a aseina achun, Manipur state in kum 1 sung’in hal hi 20,000 MT angaicha in ahin tua state sung’a aum jouse a ninglhing joulou ding ahi ati.

Authorized dealers ho hal po ding’in akikham’in ahin unauthorized dealers hilou agriculture minister patoh kinai ho hal poding’in phalna akipe e tin aman aseiyin ahi.

Masang chun sorkar in highway  chuleh thu leh la boijeh in lou lhou miho ding’in kailhang hoa hal akikoi neng joupoi atin ahin tua boina ima aum lou phat in aninglhing chomdeh pon ahi, hiche tolhon’a sorkar in kilepna ding aneitapoi tin aman aseiben ahi.

Gah velsei thei kit khatchu, tumasang’a chu sorkar in lou lhou mihon kailhang’a hal man dangka 700 manchu dangka 520 a amun diuva dangka crore 2 akipedoh e tia ana sei ahi ahin hal man dangka 520 chung lam ngen’a lou lhou mihon akichoh jing’u ahi.