Imphal, Lhamul 19: Phone akon hung kilungset doh na chu gelphah louvin akijam jou lhon’in hotel a numei nuchu dalhah in ana kichai kit tan ahi.
Imphal East police station hopsung Heingang Awang Leikai akon Gouramani chapa kum 33 a upa Sapam Noren @ Manao chu Lhamul nisim 18 nikho chun Waikhong police hon aman uvin Regional Institute of Medical Sciences (RIMS) a medical examination ading’in ana pui uvin ahi.

Vangsetna toh numei nu chu Thoubal district hopsung Waikhong kunjao Leikai akon M Boboy chanu kum 23 a upa Moirnagthem Priya ahi akiti.
Amani kilungset nahi phone akon hung kipan ahi. Phone akon ahung kilungset lhon kal lha 2 jouvin amani chu Lhamul nisim 20 nikho chun Waikhong Kunjao vellah jingkah nidan 11:00 vellin ana kimuto lhon’in ahi.

Jineisa Noren chun ahina kisel guhna ding chun amin akhel’in Priya chu ana kilungset pin ahi.

Akimuto lhon minute phabep jouvin amani chu akilungset na lhon subulhit ding’in Northa AOC vellah a hotel khatna ana kijam lhon tan ahi. Ahin ajing’in mipha lhem pachun sumla a che dingdan in akiseiyin akinung le talouvin numei nuchu aso so sohdin ana dalha tan ahi.

Hiche thilsoh chu police a alhut uto lhon chun case registered akibol tan ahi. Hiche tolhon chun police hon case kholchil na anei uto lhon chun phone number chu kon aman chah ham tin ana khol uvin ahileh mipha lhem pachu ana mandoh uvin ahi.

Noren hi janhia Heingang kho akon police hon nilhah nidan 1 vella agamat u ahi tin police akon thulhut chun aseiyin ahi.