Imphal, Lhalam 5 (NNN):

United Naga Council (UNC) makaina noiya Manipur hopsung Naga ho chenna lha jouse a total bandh kikou chu Lhalam nisim 5 jankim apat akilahdoh tan ahi. Ahin economic blockade vang angaiya umjing ding ahi.

Tunia kihouna aneiyu achelhah tolhon’a Naga ho chenna jouse a passenger buses holeh taxi ho lhaipan kitding ahitai. UNC in tunia aseina achun, Naga ho gam aphatseh a kisuhkeh ding deilouna a nitin a ngaichat thilho poh lena ding hi ana kikham ahi. Ahin mopohna neiho kom’a phalna lekha alhingset a aum pouleh lou leh aai (life saving drugs) poh le ho kilha ong ding ahi.

UNC in avella aseina a, Naga ho tilouvin Naga ho gam leh goo chung chang’a thulhuh na asemthei louding chuleh Naga ho phatsah na louva thulhuh na akisem a ahileh akhamtang na ding’a bolthei chan kibol ding ahi” tin Naga kiloikhom na chun aseiye. UNC hin Manipur hopsung Naga ho chenna lah jouse a achesa Lhajing (Aug) nisim 21 apat “total bandh” ana akou ahi.

UNC in aseibena achun, Naga ho gam kisuhkeh a District thah semdoh ding deilouna a Naga hon lungkim lou vetsahna a hiche kiphin nahi kichelhah pi ahi ati. Manipur (Hills Areas) Autonomous District Council Act, 1971 in phatsah na anei dungjuiya Sadar Hills district pilhing hisah na ding’a Sadar Hills Districthood Demand Committee (SHDDC) in Lhamul (July) nisim 31 jankim apat economic blockade akounung ni 2 jouva general strike akou nung Lhalam (Sept) nisim 21 nikho apat UNC in  indefinite bandh ahin kou ahi.

SHDDC in kiphin na anei sunghin National Highway 39 leh NH-53 a gati tampi panna in sorkar office phabep jong akihal lhatan ahi. Hiche a boina aum nung’in state sorkar in Manipur sung’a boina asuhlhap jou loujeh ahi tin UNC in state sorkar themmo achankit in ahi.Manipur sorkar in tutua boina suhlhap ding agotdan hi nam khat leh nam khat kitomosah na ding’a agon dan in akimu e” tin UNC in aseiye.