Kanggui, Lhalam 5:

Nisim 4 nilhah lam’a Sadar Hills Districthood Demand Committee in Sadar Hills mite kiphinna phattep louva chejom dinga anaphondoh tolhonin kiphinna huneijep cheh cheh dingin akilangtan ahi.SHDDC Sub-Committee in tuni Keithelmanbi mun’a toukhomna ana neijun kikhopna kichaijin SHDDC Sub-Committee chairman Pu J.Guite in The GOSEM Correspondent pa  kom’aaseina’a, kiphinna phattep louva achelhah kitding tolhonin huneijep’akibol ding ahitai ati.

Aman aseibena’a, phatmasa chun mipin neh le chah hihen lang, nitin insung ngaichat ho achohthei nadin jingkah lam nidan 10 chan dukan ho ana kihongin,tunia pat nin khatcha akihonsah tapoi. Chule gari neo hihen gari len hijongleh akhoh dungjuija ana kilhaisah ho jong khatcha akilhaisah tapoi. Amavang mipin akhoh dungjuija amanchah theidin Gamgiphai, Sapormeina, Kangpokpi chule adang mun phabep’a Sub-Committee  hetpehna noija gari phabep kikoi ding amangcha ding hon aman apeh’a  amanchah thei ding ahi. Sub-Committee in apeh gari tilou adang khatcha kilha louding ahitai. Sub-Committee in phalna apeh gari ho a No. lamtin na mun ho’a kipeding  phatah-a  kivekol ding ahi. Dammo veiset tha le ding ho gari tolpa tilouva mi 3 kalval phal ahilou ding ahi ati.

Pu J. Guite in thudoh khat adonbutna’a, bandh in ana kilha ong PRESS, Medical, Mail, Electricity chule  adang phabep ho tilou munchom  akon’a hung ho jengin jong Sub-Committee in aphalpeh gari ho amanding ahi. Dammo veisetna chung hihen chuleh adang peltheilou boina jeh-a lhai le hon ama changval gari’a che le va le aboltah loudiu, Imphal lam jonding hon Kangpokpi’a pat’a  phalna kipe gari ho aman akipeh uva amanchah theidiu, noilang sanga hon Gamgiphai akon’a phalna kipe gari ho bou amanthei diu ahi. Dammo veisetna chunga lhai le ding ho driver pa tilouva adammo sasah ding pum’a mi 3 bou phalna kipe ahi ati.

Alangkhatna’a, THICHAN ANNGOL a kiphinna neiho alel lhah cheh cheh jengun ahi. Ahin khatcha beh in jong nungchon ding thu aseihih beh-un ahi. Gentheina ijat toh uhen lang, boina ijat in delpha jongleu nunchon louhel din dettah in apang jing nalaijun ahi.

Kangpokpi mun’a THICHAN ANNGOL  kiphinna nei, Pi Lhingchin Hangshing in aseina’a, Sadar Hills mipi kiphinna goh hilouva Manipur pumpi boilaitah-a Chief Minister pan agamsung adalhah-a adeh-a THICHAN ANNGOL’a kiphinna nei mi hijat jen hinkho gelkhoh louva aumjeng hi gam le nam ngailu ahilouna aphondoh ahi ati. Alangkhatna’a, Kangpokpi mun mama’a THICHAN ANNGOL kiphinna nei Pi Jenny Chongloi in The GOSEM Correspondent pa kom’a aseina’a, CM pa  aphat achanglouva gamgi thu ahinseija Sadar Hills mite thum le ngeh dedang ding ati hi agamsunga THICHAN a  ANNGOL a kiphin mi hijat hinkho agelkhoh loujeh ahi. Sadar Hills mite hin amite a eigellou jeh-u ahi. Angailut amite a eigel  uleh hitobang kiphinna sangpen chepiho hinkho hi imumo toumo a agel nilhum agelkhovah dinga lom ahi. Hichan geija kakiphinnau nahsahmo’a akoija ageldao hi gamsung lamkai khat umchan le lunggel ahipoi. Hijeng jongleh kalung’u alhadeh poi. Kakiphinnau  hi kiphinna lom mong ahi. Kathum kangeh-u jong adih ahi ti kichehtah in kaheuvin kahinkhou manlutna jouse phaldoh-a dettah-a nungchon loudia  pangjing kahiuve ati. Pi Kimjalhai Kipgen in aseina’a, kakiphinnau hi taonan asuh hat ahin hijehchun muntin’a um sopi u le naoten pa henga natao nauvin neihin geldoh jengun tin taona le ngehna aneijin ahi.

Alangkhatna’a, Saikulleh Sapormeina mun’a TTHICHAN ANNGOL kiphinna nei ho lunggel jong ichom hilouvin dettah in apangjing un Amavang atahsau hatah in lhahsam aumtai ti thulhut akimun ahi.