Imphal, Lhalam 6 (NNN):
Apunba Lup makaina noiyin japi kiloikhom na hon (civil society organisations) tuni chun Manipur pumpia nitin thuso “The Telegraph” chu akhah (banned) tauvin ahi. Hiche tolhon’a “The Telegraph” thuso tuni chun Imphal khopi a ahallhau vin ahi. Tunia hiche tobang chonna hi Thichan ann-ngol kiphin na nei Irom Sharmila hinkho chung chang’a “The Telegraph” tin thuso aneijeh a kibol ahi.
Japi kilhokhom naho akon lamkai hon aseinauva, Irom Sharmila in kum 11 thichan ann-ngol kiphinna ahin neina chung’ah national media hon thuso a phengmai masapen a (front page) koiding anom pouvin ahin Sempatni chun nitin thuso “The Telegraph” in thuso aneina a thichan ann-ngol kiphin na nei Irom Sharmila hinkho chung chang’ah thupi tah in pheng mai masa pen in ahintah lang uvin hiche jeh hin nasatah in akilung hang’in ahi atiuve.
Pi Irom Sharmila in Armed Forces Special Powers Act lahdoh na ding’a kiphin na anei hi national media hon dantoh kitoh louva suhmo na ding tohgon anei uve” tin Apunba Lup lamkai khatnin aseiye. Apunba Lup hon aseinauva, Irom Sharmila kimupi ding hi hahsa tah ahi, ahin New Delhi akon reporter khat in ipi ti danna bailam tah a thichan ann-ngol kiphin na neinu hi ahung kimupi thei ham? tin mopohna neiho kom’a kon “The Telegraph reporter” pahi phalna apeh ham? tin thudoh jong aneiyin ahi. “Hiche hi Manipur sung’a cheng mipi jouse ding’a kijumsona (insult) ahi” tin Apunba Lup lamkai hochun lunghan tah in asei uvin ahi.
Hetthei khatchu, Apunba Lup kiloikhom nahi United Committee, Manipur (UCM) leh AMUCO panna a japi kiloikhom na chom chom kigopkhom na a kisem ahi. Apunba Lup a lamkai hon tunia kihouna anei jou uvin nilhah lam chun Manipur Press Club mun’a thuso miho kom’a hiche chung chang’a houlimna anei uvin ahi. Amahon aseinauva, The Telegraph thuso a editor pa Imphal ahung’a ngaidam ahung thum louleh The Telegraph hi Manipur sung’a ki khah jing ding ahitai atiuve. Thulhut (Report) kimu dungjuiyin Manipur sung’a hin niseh in The Telegraph thuso hi copies 8000 (eight thousand) tobang akijoh (circulated) in ahi ati. Hiche tolhon hin state capital mun chom chom’a kiloikhom na chom chom in The Telegraph thuso tampi ahallha uve tin thulhut in aseiyin ahi.
