Kanggui, Lhalam 13:

Kumseh a SAHNIT NI Kuki chate chenna mun jouse’a akiman jing tolhonin tunin jong muntin’a lunghem vetsahnan inson’a ponvom khaidoh-in, von vom’a kivon’in SAH akinit kit-in ahi.

Kangpokpi mun’a jinglam nidan 6:00 apat-in jinglam nidan 10:00 chan’in Kangpokpi Christian Church a kho sung’a jalhang kiloikhomna’a lamkai cheng leh Sorkar natong milun milal hon taokhomna le sopi ngaicheng lunghempina ana neijun ahi.

Kangpokpi Town Committee lamkai cheng’in jong amaho office mun’a jingkah lam nidan 11:00 in taokhomna aneijun sopi ana mollem cheng jana leh ngailut vetsahnan minute khat thipchet-a umna anei uvin ahi.

Hiche kingon na lamkai khat in aseina’a, i-sopiu ngaicheng lung leh lha aumnah leh tuni chan’a achungthu-u Sorkar in thutan na dihtah asemdoh loulai hi lungdam hihbeh unte. Hijehchun sopite, i-sopi hou lunghempina leh puldouna chuleh igeldohnau nikho hi thangtomnan nei da taute, lunghanna tampi umjongleh thoh kutkut in achungthu-u dihtah-a akitan lhah ding joh hi igelkhoh joh diuvin dei a um’e. Hiche tolhon’a hi “BLACK DAY FOR JUSTICE” ti thupi mang’a tunia hi SAH init-u ahi ati.

Aman aseibena’a chun, eikitha dan’u, igenthei dan hou hi suhmiljou hoi chu ahipoi. Ahin tunia hiche thusim chu isei uva I ilamlo diuham? I-lung-u hangsah be cheh in, eithat eiman hou bolchah ding lunggul hatjo cheh-in, setnan ilungthim’u alodim bep ding ahi. Pathenin eiho chonset angaidam bang’a ichung uva khangit loubolte i-ngamdam ule Pan amaho chung’a phu hinlan tin ichungthu-u adihtah in hung kitanlhan te ati.Mipin inn son’a ponlap vom akhaidoh soh keijun von vom’in kivon’in Kukite ding’a suhmil theilou SAHNIT NI kilomtah in amangun ahi. Kangpokpi mun’a sumkolveina mun ho sunkim chan akikhahtup chet-in ahi.

Gari’a che le vah le ho jong lamtinna mun’a nuten akham’un ponlap vom kikhailou ho akihoupi uvin amaho nopnatah-in, puldou leh lunghempina vetsahnan ponlap vom neocha cha asem hou chu a gari uva atahpeh soh keijun ahi.

Hitobang ma chun NH-2 lamlhong suh-a um khotin muntin’a SAHNIT NI hi amang sohkeijun, inn son’a ponlap vom akhaidoh’un, von vom’in akivon uvin SAHNIT nikho amangun ahi.

British Broadcasting Corporation (BBC) in Lhalam 13, 1993 a eiki thanau hi “ethnic cleansing by Naga separatists” tin ana seijin Cable News Network (CNN) in Joupi kithana chu “Genocide” tin anaseijin ahi.  Chuleh adang dang vannoi thuso hon ‘bloody ethnic cleansing” tin ana seijun ahi.

Alangkhatna’a, tunilhah lamin State Security Force ho NH-2 lang hung diu ahi ti thulhut ginchat umtah khat akimun, Gamgiphai mun’a nuten hangsantah-a tin’a khatcha lutsah louding atiuve ti thulhut akimun ahi. Gamgiphai akon’a thulhut chun aseibena’a, Sekmai Police Station’a OC pa ahung’in, Motbung’a agol khattoh kimuto’a chego kahi atin, hinlah ginmo jeh-in akilutsah tapon akinungle kittai ati. Thulhut chun, Gamgiphai mun’a nuten State security force hohi hung jongleu kiting ding, koima kilutsah louding ahi atiuvin jan khovah-a lamting din gontupsan aum uve tin jong aseibei.