Imphal, Lhalam 14 (NNN):

Manipur sorkar in kivaihomna thahsem ding leh Police boundary thah kaina ding’a committee asem chu United Naga Council (UNC) in tunin adeilou na thu Union home minister heng alhut tan ahi.

Union home minister P Chidambaram heng’a UNC in jihtho a hetsah na aneina a, Manipur sorkar in kivaihomna thahsem ding leh Police boundary thah kaiding atina chung chang’ah Lhalam (Sept) nisim 15 nikho teng japi in gelkhomna akinei go in hiche tolhon’a gelkhohna hin neiyin ati.

P Chidambaram heng’a UNC lekha thot in aseina a, “Naga ho kho jousen gamgi chuleh athuneina (territorial boundary & jurisdiction) aneisoh keiyin ahi. Naga holah hihen nam dang ho chuleh state sorkar akon hijongleh Naga hon apu apateu akon gam anei uhi ahesoh kei uvin ahi. Hiche tolhon’in Naga hon amaho hetlouva gam kilahpeh na leh kichuna hohi akhang akhang’a kana dou jing uleh kana tin jing uchu ahi. Chuleh namdang hon districts ahilouleh blocks semdoh ding leh pilhing sah ding atiu hi Naga hon akijahda pon chuleh khamjong akikham pon ahi” ati.

Ahin Naga kiloikhom na chun aseibena a, Ka gam uhi eiki hetpeh uhenlang chuleh ei kija peh hen. Chuleh agamnei tetoh kihoutoh na umlouva gamsung kivaihomna lemchang na ding tia gamsung suhkeh ding kiti hi jochanna kiting ding ahi ati.

“Keihon kaseibe nom uchu ahileh India sorkar in gelkhohna ahin neina din Lhajing (Aug) nisim 18, 2011 nikho in India Prime Minister chuleh Lhajing (Aug) nisim 26, 2011 nikho in nangma office a Naga holeh Manipur sorkar in 1981, 1992, 1996 leh 1998 kum’a Sardar Hills district pilhing hisah na chung chang’a kinoptona ana kinei chu lekha thot in hetsah na ahung kineiyin ahi. 1998 kum’a kinoptona (Memorandum of Understanding) chun 1981, 1992 leh 1996 kum’a kinoptona ana kinei jana pehding leh Naga holeh Kuki ho kikah a chamna aumtheina ding’a kihoutohna neijing ding ana kitin ahi” tin Union home minister heng’a UNC lekha thot chun aseiben ahi.

“CRA & PB in Lhalam nisim 15 nikho teng Imphal mun’a japi kikhopna neidin Lhalam nisim 14 nikho chun hetsah thuphon (notification) aneiyin ahi. Hiche thillen tah hin nam khat leh nam khat kikah a chamna aumna ding’a kigong ahipon boina semdohna ding’a kigong ahi. Hiche tolhon’a hiche thua boina ahungso a ahileh Manipur sorkar in mo akipoh ding ahi” ati.

UNC in Chidambaram kom’a avella ageldoh ding’a lekhat thotna aseina achun, Manipur a cheng Naga ho ding’a thilgon tumbeh (alternative arrangement) aneiding’a United Naga Council makaina noiya India sorkar panna Manipur sorkar leh Naga hon kihouna (tripartite talk)anei chelhahsah louna ding’in Manipur sorkar in district thah semdoh ding leh pilhing sahding gangtah in ahin gong’in ahi.

“Kivaihomna thahsem ding leh Police boundary thah kaiding kiti hi Naga ho ding’a atumbeh a thilgon (alternative arrangement) toh akikhetna ima aumpon hiche tolhon’a Manipur sorkar vaihomna pamlam’a atumbeh a thilgon (alternative arrangement) neiding’in Naga hon temna ahung kineiye”tin UNC lekha thot chun aseiye.

“Hiche tolhon’a tutua Manipur dinmun ho chung chang jeh a apokeh ding konsa aum boina suhlhapna ding’a Manipur sorkar thupeh hin nei ding’in temna ahung kineiye” tin UNC in aseiben ahi.