LONDON (England), Lhalam 10 (Bureau Report):

Tottenham le Queens Park Rangers techun Los Angeles Galaxy a Major League Soccer contract anei kum lhun a abei ding ahi tolhon chun David Beckham lahlut na neiding lunggel aneiyun ahi. Hiche kum 36 a upa midfielder pahin, MLS off-season chai chun Tottenham to training ana neikhom in, chule manager Harry Redknapp in ahung lhung ding Tolbol (Jan) teng soikai lutna nei ding thanopna aneiyin ahi.

Chuva chun, “David Beckham jah a kanom poi, nati thei lou hel ding ahi. Koi koi club hijong le amahin pohdoh tampi aneithei ahi” tin Gansemni (Fri) nichun Redknapp cin ana seiye. “Kum masa chun keiho henga kichuhna ahung neiyin ahi. Player hina chule mihem khat hina a ki-kom pi le ki-vop pi nomtah pasal khat ahi” tinjong aseiyin, chule, “Amahi top-class professional khat ana hi ahin, golhang (players) hon avet ton a ngaisang a akoi khat ahi najeh injong aum ding chu deisah khat ahi” tinjong Redknapp chun ana seiye.

Hinla Beckham hilai a soikai lutna ding dinmun chunga, Redknapp in “Kehepoi. Sum-le-pai dinmun chule iti lam a kigong ding ham tichu kahe hih beh’a, ajeh chu chairman pa toh hiche chungthu a ka kihou lim lhon naipon ahi” atin, “Ahin, amahi hilai mun a ahun glut ding chu kadei lheh’e” atin ahi.QPR in hiche Manchester United le Real Madrid player luipa Premier League newcomers a hinpoh lutna dia lung thanopna anei chu aneipa Tony Fernandes akon tweet bolna khat a ana sodoh in ahi. Chuva chun, “Hiche thu hi chairman Tony Fernandes to ki-houlhah na kanei lhon (nai) poi” atin ahi.