Sah-solam gamkaija state dangho bangin Assam jonghi galguhbol hatnamun ahi. Ahinlah, ULFA hi centre sorkar toh chamna thu seidinga dokhang phunga kimai ngatna atoulhon phat hin Assam mipihin chamna hungum tante tin kinepna lentah anei taove. 1979 kum’a patna chamlhat muna dinga ULFA hin galguh abolpan ahitai. Vangset umtah chun akihounao first round jouchun ULFA leh sorkar kikah a kitahsanto louna neokhat aumjeh in machalna aum behsehpoi. Hijouchun, election jeh in akidedang kitne. Ningkum Ellha chun ULFA hin Indira Goswami lamkainan civil society mi 11 India sorkar toh kihou dingin alhengdoh in ahi. Hichiva patchun hem le thal manjong akih taove. Galguhbol atamjo hin tupledoi anei naovakhun chamlhatna muding tihi ajaosah nomkei jiuvin, ahinlah hetdinga thilpha khatchu India gam lhelhah a chamlhatna gamtum semding kitihi India danpi’n aphallou ahi. Hijehchun, India sepai thichai keiding hijongleh India gamhi akelouna dinga ahuhding ahi. ULFA lamkai hohin hichi hi ahetdoh jeh-u hidiham, chamlhatna athumnao dinmun’a konin ahung kumsuh uvin, India danpi hopsunga kihou ding anom taove. Thingnoi lamkai hohin chamlhatna gamtum akimu theipoi tihi henao vinte, hijongleh mipi tosot munathei dinga hichi thucheng hi amanchah-u hidingin tahsan aumme. Tua sah-solam gamkaija meilhei leh Naga thingnoi ho jonghin chamlhatna gam deldoh ding tin apang chahkheh uvin, mutheilou thil kithum tobang ahiji jehchun achai naleh India sorkar toh kihou chamding adei teng uleh ULFA ho banga ahung nemsuh-u ngaithou thouding in akimun ahi.

India gam’a galguhbol ahoise loitah ULFA hi akijol lungdam tan, pachat theihi mi tampi aumme. ULFA hin condition umlou hella kihou ding anop phatnin preliminary kihouna chu central sorkar toh aneitai. Geldoh ding khatchu, masanga chu ULFA hin kihouna dinga Assam chamlhatna hi jaotei ding anati ahi. Chamlhatna kitihi muthei thil ahipoi tihi ahedoh tai. Chubannah thil tampijeh hin ULFA hin lhahsamna aneije. India sepai ho khutna molphouna amukeo hilouvin Bangladesh leh Bhutan jonghin kagam’a nakisel theiloudiu ahitai atipeh taove. Bhutan leh Bangladesh hin agamsung uva ULFA hochu ahetheng taovin chuleh India hin ULFA lamkai hochu abanmat taove. ULFA tosot hochun lamkai kiman hochu ajanao salam apeuve. Alang khatnah, mi phabepchun lamkai hohin chamna adeijeh uva meithal atolkoiju ahipon, sorkar sepaijin amatnu ahi bouvin, kho helou milham atha houchu ngaidam thei hiponte atiuve. Bangladesh prime minister Sheikh Hasina hin ULFA lamkai tampi India khutna ahinpehlut jeh hin achunga pachatna lentah pehthei ahi. Alang khatnah, Assam mitehin ULFA khanset jeh in milham tampi athitan, kachim taove tin ahung aodoh taove. Hichengho jeh hin ULFA hin India douna a gal abol aphat chomlou danhi akihetdoh tan, India danpi noija Assam mite chamlhatna venbit thei ahidan jonghi ahedoh taove. ULFA lamkai hohin milham athanao, 1997 kum’a Sanjay Ghose athao chuleh 2004 kum’a bomb apojahsah uva chapang tampin ahinkho achanlo naochu suhkhel lentah ahi atitaove.

Central sorkar hin lungkot hong puma dinmun detchetna alah a Assam galguh bolho akimaitopi danhi pachat umtah ahi. Assam mitehin lunglhai louna tampi anei uve – state sunga economy khantou louna, Bangladesh a kona lamdih louva pangal hung kichao lutho, chado leh thao a kona sum hunglut hohi kaphat chompi pouve tia akingai setnao ahi. Atahbah chun, centre hin khohsahna ananei domleh ULFA hi kiphutdoh lou maithei ahi. State sunga chamna tahbeh umnathei dinga hicheng hohi suhlhap ngaijinte. ULFA lamkai Paresh Barua’n kihou chamding kadeipoi tia galguhbol angahdeh louhi phatah a sorkar hin agelkhoh angaije. Mipin kihou chamding adeijeh uhin ama jonghin alungel hinkhel tei jinte tihi kinepna lentah ahi. ULFA lamkai ho songkul’a kona ahung potdoh uchun kihou chamna hi alolhin louleh kakinungle kitdiu ahi tin kichentah in asei uve. Lamkai ho thusei hi hoitah a kholchil din aphai. Chamna thu kiseija pathin ULFA hohin khanset abolhih naove, hijongleh tujenga jong ipi hungsoh diham kichentah a seithei ahipoi. Ipichu hita jongleh, political lamkai akitup pouleh Assam’a chamna ahung um dinghi kinep aummin ahi.

Lhalam nisim 3 nikho a ULFA, central leh Assam sorkar’n suspension of operation (SoO) chunga anopnao khut henna (signature) akai uchun ULFA ten hem le thal lhalouva phat chomkhat aum naochu phudetna anei ahi. ULFA tehin chamlhatna ngeh tapou vinge atiuva chuleh khanset jong boltapou vinge tia phondohna aneijeh uhin tripartite kinopto nahi athupisah lheh e. 1992 kum’a Narasimha Rao letlaija akihoumo naochu ULFA tehin chamlhatna mong-mong anati jeh-u ahi. SoO akinopto naohi khonunga pilhingtah a kinoptona  hung umnathei ahi tia lahthei ahi. Akipat tilchun ULFA hi khangthah mi tampin anadeije. Ahin, phat ahungche toh lhonnin, mona neilou milham thatjing gamvah danna ahung umdoh phatnin mipi tosotna dei bangin amu tapouve. Myanmar leh Bangladesh in kagam sunga nakisel theiloudiu ahitai atiphat’n ULFA sepai leh manchah hi anilhom jengtan, amaho dinga hinjouna dingdan ahi tapoi. Achaina a Arabinda Rajkhowa akimat tah vangchun ULFA dinga akhum khana tobang ahitai. Paresh Barua lamkaina a ULFA sepai themkhat’n chamlhatna kitihi kipedoh ponte tia apan vangun mi lhom chakhat bou ahijeh uhin, kichat ding behseh ahipoi. Sorkar hin ceasefire noija hunglut louho din SoO hi kimangthei ponte tin aphongtai. ULFA thilngeh hohi India danpi noija ahi pouleh, sorkar dinga gelmo ahiding tahsan aumpoi. 1986 kum’a Mizo accord lolhin danhi ivetleh, ULFA jonghi centre hin accord neipileh alolhin ding danhi kinep aumme. 

Lamka, Lhalam 21:

Churachandpur District Students' Union(CDSU) leh Churachandpur Joint Philantrophice Organisation kithokhomna noiya Churachandpur District Hospital mun'a M.O (Specialist), Technical& Non-Technical staffs, leh Casualty pilhin sah ding leh Power Supply achom ah pehna ding'a Manipur sorkar kom'a avel vel'a ngehna lekha apeh na chung’a Manipur Sorkar in nahsah louva akoijeh a achesa Lhalam (Sept) nisim 20 apat Churachandpur District sung'a um Government Office jouse phattep umlouva athilngeh hou akisuhbulhit tokah ading’in akhah tauvin ahi. Ahin Government Office jouse akikhah in chuleh Tuibuong mun'a S.P Office mun'a um Treasury Office, Deputy Commissioner office, DRDA Office panna in ZEO Office jong Churachandpur Police ho venbit na noiya angai abang’in office Staff ho akai uvin chuleh Office kikha na mun ho'a Police hon Duty abol uvin ahi. Alangkhatna tunin chun Autonomous District Council Office akikhah in Police hon Duty abol uvin ahi.

Lamka, Lhalam 21:

St.Chullouphai Kho mun'a Cheng Pu.Manglam Haokip in achesa Lhalam nisim 20 jingkah nidan 3.30 vel chun alupna kom'a atoka sakhao sung'a dangka 2000/- akoi chu melhetlou Pasal khat in a Window apat alut in sum chu agun window akon akichom lhan gucha pa husan Pu.Manglam in jah phat in adel leh von aguh ho chuleh G-5 Mobile khat, DVD Player Khat leh Sum kikhol na Leibel khat chu Window kom'a adalhan Gucha pa chu ana jam mang tan ahi.

Hiche tolhon’a Gucha pan adalhah von hochu aneihon Lhalam nisim 21 apat nisim 25 sung'a hung kilah ding’in St.Chullouphai Youth Club President Pu.Jerry Thangboi Haokip in ama khutna hung kilah diuvin von leh thil neiho kom’a hetsahna aneiyin ahi.

Lamka, Lhalam 21:

New Delhi akon'a hung Standing Together to Enable Peace,Trust(STEP) hon Churachandpur District sung'a themjil na mun'a simlai hotoh International Day of Peace 2011 kin amang uvin ahi.

Hiche Kingon achun STEP Director Shriya Jani leh STEP Project Co-ordinator Samuel Paomai in H.M English H/s, Lanva School, Rengkai Govt H/s, V.K Tawnna College akon simlai hungpang hochu tilkhouna anei lhon’in ahi.

Lamka, Lhalam 21:

The Malsawm Initiative School for Children Special Need hon World Deaf Day ahunglhung ding Lhalam nisim 23 nilhah lang nidan 1:00 teng Bungmual mun'a amang ding’u ahi.

Hiche kin'a Dr.N.Thangginmang in Dental Awareness toh kisai'a houlimna aneiding ahi. Hiche kin'a The Malsawm Initiative ngailu mipi ho jouse hiche kin'a hungpang ding’in Pu.Paojagin in temna aneiyin ahi.

Tamenglong, Lhalam 21:

Tamenglong kailhang (Bazar) mun’a SUI Hotel maiya tuni Lhalam nisim 21 jingkah nidan 12:45 vel chun melhet louhon gari 3 ahallha uvin ahi. Hiche gari hohin tunia Trinity Public School complex mun’a Tamenlong 53 ST assembly constituency tetding’a kigo Janghemlung Panmei in golnop kingon khat agonna a Imphal apat lasa ho (artists) leh musical instruments ahinpoh ahi.

Wankhei a cheng Hijam Suresh gari Bolero jeeps ni- MNO4 A/5795, MNO3P/2323 leh Z Kikhonbou gari Tata Safari MNOIK/ 6893 chu akihallha chaihel in ahi. Kikhoubou hi Tamei A/C a election tetding’a kigo holah a khat ahi. Dangka lakh 3 man artist ho Musical instruments hochu gari sung’a kikoi chu kihallah tha ahi.
Hiche thil leh loo kihallhah na thilsoh chu Tamenglong district sung’a um jalai/japi kiloikhom na tampin nasatah in demna anei uvin ahi. Hiche thilsoh chung chang’a tuni chun Zeliangrong House, Apollo bazar Tamenglong mun’a Zeliangrong Womens’ Union, Manipur, Zeliangrong youth Front, Zeliangrong Students’ Union (Tamenglong), Zeliangrong Elders’ Forum for Peace Broker leh Zeliangrong Union (Tamenglong Zone) akon thalheng ho panna in press conference khat aum’in ahi.

Hiche press conference a pang member ho chun meiya thil leh loo kihallhahna thilsoh chu nasath in demna anei uvin chuleh khonung’a hitobang’a chalohna Avella abollou diuvin hiche a mopohna nei changval ho leh kiloikhomna kom’a temna jong anei uvin ahi. Zeliangrong Elders for Peace Brokers akon Co-convener D Dikambui in aseina achun, “Hiche thilsoh hin mipi ho lungsung’a lungdonna asodoh ding ahi ati. “Election ahung nai tolhon’a ahung lhung ding election a candidate 3 in kitetna ahin neigot na chung’a hitobang thilsoh ahung umhin khat leh khat kikahna a kihetthem tolouna ahinso thei ahijeh in hiche thilsoh hi kholchilna kineiya chuleh mopohna neiho kom’a mona neiho mandoh ding’a thupeh kineiding ahi” ati. Boina ahung umteng leh mipi hon nam khat leh nam khat kikahna boina semdoh thei jaothu ho seilou ding’in aman temna aneiyin ahi.

Tamenglong, Lhalam 21:

Ahung lhung 10th Assembly Elections a ding’a candidate hon atosot ding akihalnauva Tamenglong Headquarters sung’a Election ading’a kigotna sangtah in aumtan ahi. Tamenglong khopi a mipi ho ahung potdoh uvin 53 Tamenglong A/C tet ding’a kigo candidate ho tosotna vetsahna a golnop kingon’a mipo ding’a gari tampi kigol hochu aveuvin ahi.

Tutua 53 Tamenglong A/C a MLA chuleh Hill Area Committee a vice chairman Khangthuanang Panmei, election tetding’a kigo Janghemlung Panmei chuleh ex-minister Samuel Jendai in tuni chun mun chom chom’a kingon chom chom abol uvin ahi.MLA Khangthuanang Panmei in Namlalong Tamenglong ward number 2 achenna inn mun’a election rally apatding tolhon’in worship programme khat abollin ahi. Hiche tobang chun Janghemlung Panmei in jong Trinity complex mun’a worship service khatma abollin ahi.

Ex minister Samuel Jendai in jong achenna Model village, ward number 3 mun’a um a chenna inn na “Supporters Get Together” tin kingon khat abollin ahi. Hiche kigon achun lasa them tah tah Albina Gonson, Sorri Senjam, Bobin, Benny Khongsai, Tharte Zami leh adang dang hon mipi holeh candidate tosot hochu ana choh hal lheh uvin ahi. Asang’a sim mipi ho ding chun ann-neh khomna jong aum’in ahi.Worship program ho achun taona leh vahchoilah sahna aum’in chuleh candidate ho ding’a vangthumpehna jong aum’in ahi.

Shillong, Lhalam 21:

Congress general secretary Rahul Gandhi in Vahchanni(wed) nia ahoulimna achun, Gamsung’a nehguh (corruption) suhmang na ding’in gamsung kivai pohna (political system) hin mipi thunei na hatah a apeh angaiye ati.Gamsung’a nehguh (corruption) suhmang na ding’in gamsung kivai pohna (political system) hin mipi thunei na ding’a Youth Congress hon mipi (common man) ding’a kot (door) ahon diu angaiye” tin Gandhi in Youth Congress membership hon Meghalaya Chief Minister Makul Sangma constituency, Ampati mun’a rally makai na anei peh uvin asei in ahi.

Aman aseina achun, Youth Congress nominated members ho Youth Congress elected members a akikhel tolhon’a khangdong(youth)hon centre kivai poh na a pan alah uva chuleh election atet theina diuvin phat kilemchang tah aum’in ahi. Centre kivai poh na a khangdong(youth) ho pang ding’a temna anei na achun ama aseiyin “Centre a thunei na nei thei teng na gamsung a khangtou na um ding ahi” ati. CM Makul Sangma,CWC member in charge of Meghalaya Dhaniran Shandil chuleh AICC secretary Sanjay Bapna panna a minute 40 rally kibol na achun Rahul in “Tuni hin modernity leh technology veh angai in ahi. 21st century a Technology hin gamsung’a khantouna lentah ahinpoh lutding ahi.

Hijeh chun lunggel thah thah, tohgon thah thah poh doh angaiye ati. Gandhi in traditional institution apachat tolhon’in traditional ideas in jong gamsung machal na ding’a panna lentah aneiding ahi tin aseiye. “Traditional institutions akon jil ding tamtah aum’in chuleh traditional ideas in 21st century a gamsung machalna apehthei ding ahi. Congress ading’in gamsung’a bahkai jouse hi apoimo in ahi. Bahkai jouse hin gamsung ading’a pohdoh ding anei cheh uve” tin aman aseiyin ahi. Gandhi in Meghalaya a matrilineal society pachatna lentah aneiyin, “Meghalaya a numei hon pan alahdan uhi gamsung pumpi a ding a vehkol theitah (example) ahi” ati.

Imphal, Lhalam 21(NNN):

RPF/PLA Assistant publicity secretary GM Changjou kimat nung’a kaiholmona chung’a Kangleipak Communist Party (Maoist) hon state pumpia pungkal 12 sauva General strike akouna chung’a bandh toh kisaiya boina ima umlouvin akichai tan ahi.

Jingkah nidan 5:00 c.m apat nilhah nidan 5:00 c.n channa kikou general strike chun Imphal phaicham District sung’a inter & intra state public chuleh private transport facilities ho jong lampi a lhaile akimu pon ahi.Private business, public educational institutions ho jong general strike jeh in akikhah soh keiyin ahi. Government office ho a jong staff akai lhomcha ahin alangkhatna private gari ho Imphal lamlen a lhai aum thouvin ahi.

RPF /PLA Assistant publicity secretary GM Changjou hi Lhajing(Aug) nisim 18 nikho achu Dimapur akon Army ho hiding’a ginchat hon apui doh uva hiche akonna chu ageina lam ana kihetalou ahi. Hiche pungkal 12 sauva general strike hi PLA lamkai GM Changjou kimat nung’a kiholmo na chung chang’a kikou ahi. Changjou kiholmo na chung chang’a general strike kikouna tuchung’a ahi anivei channa ahitai.

New Lambulane, Lhalam 21:

Lhalam nisim 20, 2011 nikho a The Gosem nitin thuso a Lien Touthang Saikul min’a “Open Letter To Pu THANGSO BAITE, MP” tia thuso ahin neina chung’a hiche thuso na nei hon kiphon na neiding’in Touthang Phungpi Organisation (TPO) in hetsahna ahin neiyin ahi.

Touthang Phungpi Organisation (TPO) akon thuphon kimu achun, “Achesa Lhalam (Sept) nisim 20,2011 Leisemni (Tue) nia Lien Touthang Saikul min a M.P pa demna hung kiso thu hi gil tah in TPO(M) in khol chil na akineijin ahi. Tuni chan hitobang “Lien Touthang” kiti hi akimupoi” ati.

Hinla koitabang hetkhah louva thuso hin nei ana um khah leh tuni Lhalam nisim 21, 2011 apat Lhalam nisim 24, 2011 ni 3 sung’a akipe contact no. leh address (TPO President Poalet Touthang #8575297145, Cannan Veng,Imphal, TPO General Secretary Dr.Helkhomang Touthang, #9436209068,New Lambulane, Imphal)a hung kiphon ding in hetsah na ahung kineije” tin thuphon chun aseiye.