Imphal, Lhalam 18:

Tamenglong district sung’a um Oinamlong kho a economic blocade tosot ho dia ginmo hon misemni (Sat) nichun thilpo gari 6 ana hal lha uvin ahi. Thulhut kimu dung juiyin hiche gari kihal lha hochu Imphal a pat km 222 a gamla Jiribam a pat a hung kipat doh u ahi. Chuleh Gari kihal na mun Oinamlong hi Imphal a pat km 150 a gam lha ahi.

Hetthei khatchu, Sadar Hills District Demand Committee (SHDDC)in Manipur hopsung’a um national highway 53( imphal-jiribam-silchar ) leh NH-39 (numalligiri assam a pat india toh Burma gamgi chin moreh chan) hi ana kha u ahi. Hiche akiphin lo najeh uchu ahi leh naga ho tam joh na district, Senapati a kon a kuki ho tam chen nahop sungse district khat hop sung’a chen di ati jeh uva kiphin na abol u ahi. Hiche kiphinna hi UNC in nasahtah a adou dal ahi. Official akon thulhut kimu in aseina achun, Sorkar in SHDDC lamkai ho jouse matna ding thu ana lha uvin, ahivang’in tu chan’in koima aki man nai poi ati. Hiche economic blockades jeh hin kailhang (bazaar) a thil man jong akal gam tan ahi.

Imphal, Lhalam 18 (Newmai News Network):

Naga People's Front (NPF), Manipur unit in tunia thuphon anei nauva chun assembly election leh party ticket kihop ding dan state level ading’in kihouna a um lou lai vang’in khosung leh veng sung ho a party hatna ding leh lungtup molso theina ding’a natoh akipan tai ati.

NPF, Manipur unit a political affairs secretary-in-charge Ningreingam Ruivah in aseina achun, party sung’a natong chuleh office a natong ho hijong leh koiman mopoh na kipe louva hiche chung chang’a thu amohsei sei louding’in hetsahna aneiyin ahi. Hiche jeh a chu hiche tobang a thu kisei ho hi kihet them tona ding leh khonung a boina ema ahung um louna ding’a thuphon kinei ahi tin Ningreingam Ruivah in aseiyin ahi.Aman aseibena a, seiding dohding khoh a um tengleh aphat dung juijin kisei khom nan te ati.

Kanggui, Lhalam 16:

Brig. Thomas Ground, Kangpokpi mun’a chelhajing, Sadar Hills District League’a tunin Saikul Hill Town le Pangjang Youth Club in kibahna aneijin, JSYC in Walked Over amun, Muvanlai Athletics in goljona ananeijin ahi.Kichepna masa’a Saikul Hill Town leh Pangjang Youth Club in kithuhtah in kichepna aneilhon’in alang lang’a goal 2 cheh ana kikhumto lhonin ahi.

Kichep kipat jou minute bou chena laijin Pangjang Youth Club lang’a Jersey No. 21 Gl.Satgoulen Kipgen in Sahei FC lang’a goal hoitah khat ana khum’in ahi. Chujou minute 9 in Saikul Hill Town lang’a Jersey No. 12 M.Haokip in lethuhna ahineijin kibahna ahin nei-un ahi. Phatchom khatsetpi alang langa goal kikhumto talouva kithuh tah-a ahung kichep jounung’un minute 19 in Pangjang YC lang’a Jersey No.3 Papao in Saikul Hill Town lang’a goal khat ahin khum kittan Saikul Hill Town te dingin pohgin lentah apetan ahi. Hitichun Pangjang YC in goal khat’a ana maikaipeh-un 1st Half anakichaije.

Second half kipat-in, Saikul Hill Town ten lethuh teiding ngaiton atheitop-un pan ahin lauvin, hilah bailamtah-in alethuh joupouvin ahi. Pangjang YC ten goljona kineitei tante tin kinepna jong ana neiman tauvin tin hinlah minute 46 in Saikul Hill Town lang’a Jersey No.3 Khukhup in goal hoitah khat Pangjang YC langa ahinkhum tolhonin Saikul Hill Town te hailhung lelna chu ahin subeitan ahi. Nasatah’a alang lang’a akihambol ten vangun goal kikhumto be talouvin phat anakichatan ahi.Kichep anichan’a, JSYC leh Taphou Youth Club in kichepna aneiding chu Taphou YC te ahungtah loujeh-un, JSYC ten walked over ana mutauvin ahi.

Kichep thumchan’a, Ninou FC le Muvanlai Athletics hon kichep vetnom umtah podoh cheh-in kichepna aneijun ahi. First half sung’a chun Muvanlai Athletics ten goal khumthei na phat gomkom tampi ana neijun hinlah amalang’a lhai ho kihetthemna lhahsam khahjeh-in goal anakhum tei pouvin ahi. Ahin hiche akihetthem lounau chu minute 27 in Jersey No. 9 Haominlen ahin subeitan ahi. Aloipa passing lungnengtah-in akimantan’in Ninou FC defender ho lungthim themtah-in alhemlhan avejou sen aojap-a akhumding’a angaitou chu olchan Ninou FC goal ngahpa matphah jeplou dingin goal sung’a ana lihlut in ahi.

Second half kipat-in Ninou FC lunglha louvin pan alauvin lethuh ding hatah in ana ngaiton uvin ahi. Ahin angaitou bang hita louvin minute 48 in Muvanlai Athletics langa Jersey No. 5 Ginkhansem in goal hoitah Ninou FC lang’a ana pekit tan ahi. Ginkhansem goal khumjou minute 4 jou (52min) in Haominlen in Ninou FC lang’a goal hoitah khat anakhum paingal kit-in ahi. Goal 3 a kichep amakaitah vangun Ninou FC te ana lunglha dehpouvin, sahdoh teiding angaiton sakol bang’a lhaihat Ninou FC lang’a Jersey No.7 pan atheitop-in kichepna ana neijin ahin anasadoh joutapon ahi. Muvanlai Athletics lang’a Ginkhansem in minute 60 a goal khat ahin khumbe tolhonin Ninou FC te chu goal 4 in jona ananei tauvin ahi.

Ninou FC te hi Saikul Hill Town in phatmasa’a chu goal 4 mama’a ana jou’u ahi. Ninou FC tehi khangdong chacha atha’u ahina ding bang’a kilhit jeploulai hijongleu akichep’u vetnom aumin, kichep veho tampi mitla khat in apangun ahi. Tu’a bang’a akichep jompeh’ule “Most Promising Team” chanvou chanthei dinmun in aum-un ahi.

Imphal, Lhalam 16 (NNN):

All Manipur Working Journalists’ Union (AMWJU), Manipur a thuso miho kiloikhom na chun kiloihomna kiphudoh kal kum 38^th lhinna nikho tuni chun Manipur press club mun na thupi tah in amang’in ahi..

Works minister K Ranjit, IFCD minister N Biren Singh, health minister L Jayanta Kummar leh state planning board a deputy chairman Bijoy Koijam ho hiche kin achun apang uvin ahi. Chuleh hiche kin a hin AMWJU president A Mobi Singh chu kin vaihom in ana pang’in ahi.

N. Biren in a ahoulim na achun, Sadar hills leh Jiribam district pilhin hisah na ding’a kiphin nahi sorkar toh journalist ho kitho a aganna thei pen a boina ho suhlhap ding ahi ati.

Sadar Hills leh jiribam pilhin ding dei jeh a akiphin mipi hohi sorkar toh kihou ding ahung nop teng uleh bou boina hohi kisei toh thei ding ahin hijeh a mipi ho lung, hin kikhel sah theichu media ho ahi jeh in press hon sorkar atosot ding uvin temna anei uvin ahi.

Economic blocade kibol kal ni 45 alhing tan, mi abang khat in epi bol a sorkar in hunam a aphut lou ham tia thudoh anei uchun aman adonbut nah a, hiche bol na dinga chu mipi in atosot u ngaija ahin, chuleh akiphin ho jong chu keiho mi ma ahi tin ana donbut in ahi.

Chuleh hiche boina hi hunam a hilou va kihou toh tho ding aki dei jeh ahi ati.

Minister K Ranjit leh minister L Jayanta Kumar in jong minister Biren’s sei bang chun media ho kom’a ngeh na anei kit lhon’in chuleh Ranjit in aseibena a, media ho hi state sung’a khantouna leh machalna lut lounaho a vetsui jing uva mipi het ding’a ahin poh doh jing ding uvin jong temna anei jin ahi.

Jayanta Kumar in asei na achun, media in sorkar bol khel hohi asuhdih jing ding keu hilouvin sorkar phatah ahi thei nading’a jong media ho hin hatah a sorkar akithopiu angaije ati.

Bijoy Koijam in media hon social worker ho lim lentah front page dung’a atah jiuvin chuleh thuso het louva khoh ho aning khat a neocha in a jih jiuvin hiche hi a khel diuvin temna leh hetsah na anei jin ahi. Aman aseibe kit na achun, hiche tobang ho front page a ekoi ji sang uvin sorkar in kum sung’a a toh phatna ho joh hi aso ji ding uvin jong asei jin ahi.“

AMWJU president A Mobi in houlim na anei na achun, media khat hina jal a mi kom’a thuso sona ding’a sum kilahna (Pay news) ho akon eki chih thei u angai je atin ahi.

Election commission in jong news kicho tho (Pay news) chung chang thudol a adin mun hoitah in asei jin adeh a ahung lhung ding assembly election sung’a hi election commission in media hon news a cho jiuve tia ginmona anei a ahi leh boina eto ding’u ahitin A Mobi in aseijin ahi.

Imphal, Lhalam 16:

Jiribam District Demand Commitee (JDDC) in Lhalam (Sept) nisim 17 jankim apat economic blocked kou ding atiu chu tutua gamsung’a mipi ten hahsah na atou gelkhohna jallin phatchom khatna ding’in aladoh tauvin ahi.

Thulhut kimu dung juiyin, JDDC in janhi nikho apat executive meeting anei jouva phatchomkhatna ding’a economic blocked kou talou ding’a thulhuhna aneiyu ahi. Thulhut in aseibena a, UNC leh SHDDC in National Highway teni a economic blocaked akoujeh a gamsung’a mipi te hahsat na gelkohna jalla economic blockade hi phatchom khat sung’a koutah louding’a thulhuh na kinei ahi ati.

Alang khatna JDDC tosot na janhi nikho a pat THI CHAN ann-ngol ding’a kipe doh Khundrakpam Rajeshkumar Singh,28,s/o Kh. Radhakishwor Singh chu JDDC in hatah a tosotna neidin aseiye.

Thuphon in aseibena a, ICHAM/State speakar in economic blockade ladoh ding’a temna aneijeh a blockade kiladoh ahipoi tin hilchen na jong aneiyin ahi.

Chuto lhon’in Dr.AK.Das, MO Jiribam CHC makai na noi in medical team hon thi chan ann-ngol ding’a kipehdoh Khudrakpam Rajeshkumar chu medical check up ana bol uvin ahi.

Doctor in thulhut anei na achun, ama condition hi tu chan in normal ahi nalaiye ati ahi vang’in urinary track a boina them khat aum’e ati.Chuleh AK Das in duty abol nauva lou leh aai chuleh akithopi ding alhah sam dan jong thulhut ahin neiyin ahi.

 Aizawl, Lhalam 16 (NNN):

Union Ministry of Housing & Urban Poverty Alleviation in 12th five year plan sung’a phaitol a vaichat na suhlhom ding ti tohgon anei toh lhon’in na tohpat ding lung gel anei tan ahi.Hiche thuhi Union Minister for Housing & Urban Poverty Alleviation & Culture Kumari Selja in Aizawl khopi a “Conclave on Urban Poverty Alleviation & Rajiv Awas Yojana” hondoh na anei na achu aphon doh ahi. Minister nun ahoulim na achun, Skill Training cum Women Vendor Marketing Complex sem doh na ding’in dangka crore 65 peh ding agot ban a jong hiche State Resource Centre ahung kisem chai teng leh akithopi thei chan’a kithopi kineiding ahi tin Mizoram Chief minister Lal Thanhawla ana het sah in ahi. Selja in aseina a, Mizoram in Rajiv Awas Yojana (RAY) a ding’a dangka crore 4.67 amu na chung chonna Jawaharlal Nehru Awaz Yojana a ding’in jong dangka crores 42 aki pe tai ati. Hiche scheme a ding’a hi sum agom asanction kibol jat chu dangka 109 crore ahi.

Minister nun aseibena achun, Mizoram sorkar pachat na sangtah anei jin chuleh Lal Thanhawla noija Mizoram sorkar in mipi phat chom na ding’a pan nasatah alah jeh in jong pachat na anei jin ahi. Aman aseibe na a, Mizoram sung’a vaichat suhbei nading’a akithopi na thei chan a akithopi ding’in jong aseiyin ahi.Minister nun jong North Eastern States sung’a Housing & Urban Poverty toh kisaija schemes ho hoitah a ache lhah thei nading’a kivaihop naho leh anatoh vesui ding phate cha asemtup u angai je tin aseiye. Minister nun aseibena achun, North East state jouse hi “Basic Services to the Urban Poor (BSUP) and Integrated Housing and Slum Development Programme (IHSDP) of JNNURM” in ahop soh kei ahi ati. North east sung’a hi housing scheme noija inn 30,690 sah ding tohgon a um’in , chuleh phaitol 48 sung’a jong project 59 aum’in dangka 909 crores hi BSUP leh IHSDP in peh ding’a phalna anei ahitai.

Minister nun aseibena achun, Central sorkar in genthei hahsa ho kithopi na ding’a dangka 718.99 crore peh ding’a agon ahin hiche ho lah a chun dangka 385.77 crore akipe doh tai atin ahi.Aman aseibena achun, phaitol 8 hi hiche natoh in ahop in chuleh 40 medium leh small cities/towns hi IHSDP (other than the 8) noija aum’in ahi ati . BSUP leh IHSDP noija hin inn 5196 akisa chaijin, chuleh inn 8118 hi akisah lai tah ahi. Hiche holah a inn 2394 hi min alo pan tai atin ahi. Minister nun jong “Urbanization & Slums in the North East Region” chung chang’a houlim anei na a, mihem 15.45% tobang hi slum areas a acheng uvin, hiche hi mun 252 a um’in ahi. India pumpia slum areas a cheng hi 27.78% ahi.

Mizoram Chief Minister Pu Lalthanhawla in jong hiche kin ahin houlim na aneiyin, Union Ministry of Housing leh Urban Poverty Alleviation noiya mipi ho hetthei ding’in JNNURM, SJSRY, BPL Survey, USHA and Rajiv Awas Yojana scheme ho phondoh na jong anei jin ahi.North Eastern States jouse- Arunachal Pradesh, Assam, Manipur, Meghalaya, Mizoram, Nagaland, Sikkim leh Tripura akon thalheng ho jong hiche kin achun apang uvin ahi. Hiche kingon hi Mizoram sorkar toh kitho a kibol ahi.

Hiche kikhopna kipat masang’a chun, Union Ministry of Housing & Urban Poverty Alleviation Secretary Shri A.K. Misra lamkai na in “10% NER Fund, SJSRY and JNNURM (North Eastern States)” chung chang’a secretary level Regional Review Meeting aum’in ahi.

Imphal, Lhalam 16 (Newmai News Network):

Saikul Area Naga People's Organisation (SANPO) in thuphon anei nauva chun, Senapati district suhkeh a Sadar Hills District sem doh ding tia sorkar in tohgon aneiye tin alungkim lounau aphong uvin ahi.

SANPO in Re-Organisation of Administrative and Police Boundaries (CRA & PB) Committee chairman kom’a lekha apeh nauva chun, Saikul sub- division sung’a Nagate chenna kho 44 a um’in ahi. Chuleh Sadar Hills district kithum hi Kuki ten a thum u ahin Sadar Hills hopsung’a cheng Zeliangrongs, Thangal, Maring chuleh Thangkul hon kahepha pouve atiuvin chuleh ka pom pouve atiu vin ahi.

SANPO in aseibena achun, Sadar Hills Districthood Demand Committee (SHDDC) in Sadar Hills sung’a cheng Zeliangrongs, Thangals, Tangkhuls chuleh Marings , ho emacha jong eidong khapouvin chuleh hiche district hi mipi kihou toh na jong um khalou mi them khat in ama ho phat chom nading’a athum u ahi atiuve.

Naga kiloikhom na ho hin CRA&PB Committee kom’a Saikul Sub-Division sung’a cheng Naga hohi gamgi thua akihoupi masat ding uvin hetsah na jong anei uvin ahi.

Shillong, Lhalam 16(NNN):

Tuni chun Orchid Lake Resort,Umian Meghalaya mun’a State Public Service Commisions, North East Region, akon chairperson leh member hon nikho 2 sauvin Regional Conference anei uvin ahi.

Hiche kingon na Meghalaya Chief Secretary W.M.S. Pariat in asei na achun, Regional Conference a State Public Service Commisions member hon boi na atoh uhi sei khom na ding chuleh ama hon mopoh na anei dung jui uva alunggel asei khom uva hiche akonna commission hi boina um louva chuleh aphat cheh cheh a amopohna asuhlhap thei ahi ati. Chuleh Pariat in Commission ho kom’a recuitment process gang tah a chai ahithei na ding’a modern technology ho amanchah diu vin aseiyin ahi.

Nikho khat sung kingon hin Public Service Commission chom chom hon natoh anei nauva ahoipen pen ho vetsah (presentation) na anei uvin chuleh State Civil Service Examination a ding’a Uniform syllabus ho, Departmental Promotion Commitee leh adang dang jong hiche achun apang’in ahi.

New Delhi (India), Lhalam 16:

Janhi khangkim apat chun sorkar oil company hon petrol liter 1 a Dangka 3.14 - 3.32 chan gei akalsah ki tauve.Hiche hi rupee exchange value anem jeh le crude oil aman kal jing jeh ahi, akitin ahi.Hinla local sales tax dung juiya petrol man hi kibang lou ding ahi. Tun Delhi a petrol liter a Rs 66.84 ahin, Mumbai a Rs 71.52, Kolkata a 71.15, chule Chennai a 70.64 ahitai.

Crude oil barrel a USD 103 ahi chun Delhi a petrol man Rs 63.70 bou ana hin, hinla tua crude oil barrel a USD 110 ahi phatna aman hung kalbe ahitai.Tuchung a petrol man akal hi lha 4 sunga dinga ani (2) vei na ahin, amasa Lhaphul (May) chun liter 1 a Dangka Rs 5 ana kal in ahi.

New Delhi,Lhalam 16:

Gansemni (Fri) nia Congress lamkai luboh hon kikhopna (Congress core group meeting) aneinau achun Rahul Gandhi jong apang'in ama hinkho a ding'in Congress Lamkai luboh ho kikhopna a apan masatna pen ahinalaiyin ahi. Ahin hiche kihoukhomna achun Sonia Gandhi vang ana pang pon ahi.

Adammo jeh a Lha 1 val ana pan lou tolhon in Sonia Gandhi in party lamkai ho panna mipi ang'ah Vanghomni chun kilahna aneiyin hiche tolhon chun Congress lamkai holeh mipi ho ading'in kipana lentah anahi e.

Lha masa a US a surgery ana ki bol jou tolhon'in Sonia Gandhi in janhi nikho a Central Election Commitee in Assembly Elections tetding candidates mi 98 min ho asei khom nauva chun apanmun ana lo in chuleh Uttar Pradesh a Assembly Election tetding'in mi 70 lhendohna ana nei uvin ahi. Lhajing (Aug) nisim 4 nikho a US a surgery kibolla ache joukal Lhalam (Sept) nisim 8 nikho a India ahung lhun jouva janhi nikho a kihoukhomna a apan chu party luboh hotoh akihoukhomna masapen ahinalaiye.